MATOD sa usa ka wellness study sa PhilCare, ang Cebuanos mahiligon sa inom ug pagpanigarilyo isip pagpa-wala sa stress kon itandi sa ubang grupo o tribu sa mga Filipino. Matod pa sa taho nga napatik sa Cebu Daily News digital nga sa Second PhilCare Wellness Index, usa ka nationwide study nga adunay 1,350 respondents apil na ang 300 gikan sa Visayas ug 75 ka mga individuals nga taga Cebu nagpakita nga 93 per cent sa mga Cebuano kusog mo-inum og alcoholic nga ilimnun samtang 61 per cent ang manigarilyo isip pawala sa stress.
Ang ubang bahin sa Visayas nga naapil sa study mao ang mga dakbayan sa Tagbilaran, Iloilo ug Bacolod. Unya beer ang kinaham nga ilimnon sa mga Bisdak. Makakonsumo kita og duha ka botelya matag semana ug 1.5 stick sa sigarilyo matag adlaw. Ah, pagkagamay ra god ana. Makahurot man gani mi ni Atty. Eddie Barrita og 15 ka botelya halos kada gabii. Dili hinoon mi manigarilyo.
Pero ang among amigo nga si Dave Cua makahurot og duha ka kaha sa sigarilyo matag adlaw. Morag panghaw sa Veco na si Dave, nagsige og bugwak og aso. Unya gahi og ulo kay bisan gidili ang pagpanigarilyo sa gawas sa Ayala Mall, manigarilyo gihapon. Guwardiya ray bantayan.
Matod gihapon sa susamang survey nagpakita nga dili kuno mahiligon ang mga Sugboanon sa sex o esmiringhoy. Mohimo lang kuno ang mga Bisaya aning pagpakighilawas ka usa sa usa ka semana. Ambot og insakto ba ni? Pero ang mga Bisaya nga nag-edad og 41 hangtod sa 60 mohimo og sex kaduha sa usa ka semana. Mas ganahan ang mga lalaking Bisdak sa sex kay gusto nila kining himoon ka duha sa usa ka semana samtang mga babaye, ka usa ra sa usa ka semana. So, mas agresibo ang mga lalaki kay sa mga babaye.
Well, dili na lang ta mo-kuwestiyon kay survey ra ba ni. Ang pag-alkontra og survey mao usab ang pag-conduct og lain survey. Pero usahay dili kaayo accurate o tukma sa sentimento sa katawhan. Mag-depende kon kinsang sektor ang gi-survey ug sa pangutana. Pero sa inyong pagtuo, mas daghan kaha nga Bisdak ang mo-inum ug manigarilyo kay sa mo-engage og sex. Busa kalalakin-an, sugod karon atong ipakita nga sayop ang survey. Mag-esmiringhoy ta permi sa atong partners. (bobbygnalzaro@gmail.com)