SUPERBALITA CEBU

Mongaya: VAL 2020 sa Naga

Panahom

ABIG mahisgotan lang nako ang personal nga obserbasyon dihang nibisita sa dapit nga nadak-an ni papa ug bakasyonan kaniadtong naa pa ko sa elementarya kay ika-190 nga pista sa patron sa Syudad sa Naga nga si St. Francis sa Assisi.

DIha man gud sa Tailorville, Tina-an nagpuyo si lolo Marcus ug Lola Tinay kaniadtong buhi pa sila. Busa, akong giisip nga hometown kining Naga.

Kagahapon, dako nakong kalipay dihang gibalita nga ang Syudad sa Naga maoy numero uno sa nituman sa mando ni Presidente Rodrigo Roa Duterte nga hawanan ang kadalanan sa mga obstruction sulod sa 60 ka adlaw.

Ang Department of Interior and Local Governments (DILG) nihatag sa Naga og high compliance nga moabot og 100 percent. Ang Syudad sa Sugbo, bisan pa man sa grabing publicity, lakip na ang Mandaue ug Talisay duna lay rating nga 81-90 kun medium compliance.

Nahimuot gyud ko sa Syudad sa Sugbo kay ikapila manghawan sa mga sidewalk vendor, apan mobalik ra man sab dayon hangtod nakahunahuna sila nga hatagan og relocation site. Bisan pa man, makaingon kita nga wala gyuy klarong kasing-kasing alang sa mga kabus nga naningabuhig tinarong mao nga ang mga vendor, manghilak na lang nga magpakiluoy.

Dayon, aron mapapas ang mga kabus nga naningabuhi sa Carbon market, gihatag kini sa City Hall sa SM.

Lahi ang atong nakita sa Syudad sa Naga. Gamay na lang gyud ang hawanan sulod sa miaging 60 ka adlaw kay dugay na mang giateman ang maong kahimtang sa liderato sa Syudad.

Gani, makaingon ko nga ang mga plano sa kalambuan sa Naga nagsugod kaniadtong Septembre 5, 2007 nga mao ang unang Charter Day sa syudad ug gi-anunsyo ni Mayor Val Chiong ang iyang programa nga Vision and Leadership 2020 kun VAL 2020.

Sa miaging pista, nakita nako nga han-ay kaayo ang implementasyon sa mga proyekto.

Ang mga vendor kaniadto naa na sa bag-ong merkado sa syudad ug duol sa merkado ang mga mag-uuma dunay bagsakan sa ilang produkto diha sa reclamation.

Ang mga vendor nga namaligyag pagkaon naa karon sa food court sa plaza duol sa Naga Boardwalk. Kadtong mangitag fine dining ug entertainment, mahimong mosaka sa Osting Restobar.

Di sila mahutdan og mga customer kay gawas sa boardwalk, nag-alirong man mga sports facilities sama sa usa ka Olympic-size swimming pool, ang dakong covered nga tennisan ug duwa-anan og badminton, ang football field, ug basketan.

Bisan pa man og naay Jollibee ug Chow King sa plaza atbang sa Simbahan, ang plaza nahimong suroyanan dili lang sa mga taga Naga, lakip na ang mga taga Minglanilla ug taga San Fernando labi na ang mga molupyo sa mga bag-ong mga subdivision. (@anol_cebu sa Twitter)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph