ANG “As-Salaam-Alaikum” maong ang pagtimbaya sa pinulongang Arabo nga nagkahulogan nga “Ang kalinaw maanaa kanimo”. Madungog kini nato sa atong mga igsoong Muslim ug madungog kini kanunay sa atong mga kaobang Pilipino nga nagatrabaho ngadto sa lugar sa mga Arabo sama sa Saudi Arabia. Nindot kining maong pagtimbaya.
Kon subayon nato ang gamot sa maong pagtimbaya, gikan kini sa pinulongang Hebreo nga “Shalom” gani ang mga “consonants” niini makita sa “Salaam” unya kalinaw usab ang gipasabot niini. Dilil kini kalinaw nga hinimo sa tawo apan usa ka gasa gikan sa Ginoo. Nindot pamalandongan nga ang atong “salamat” masubay ngadto sa Arabo nga gikan usab sa Hebreo. Kini diayng salamat miila sa gasa sa Ginoo. Ang tanang maayong butang gikan man god sa Dios ug ang atong ikatubag lamang sa kamaayo sa Dios mao ang pagpasalamat.
Napulo ka sanlahon nga mga lalaki ang giayo ni Jesus nga nagkanayon: “Lakaw ug pagpahiling kamo sa mga pari”. Apan sa napulo usa ra ang mibalik ug nagpasalamat sa atong Ginoong Jesucristo. Samaritanhon pa gyod kini nga “mihapa sa iyang tiilan, nagpasalamat kaniya”. Langyaw siya ug kontra sa mga mata sa mga Judio.
Nindot kaayo ang gibuhat niini. Una, tungod kay makaingon kita nga iyang giila ang pagkapari ni Jesus kay gimandoan baya sila sa pagpahiling sa pari. Ikaduha, mapasalamaton siya ug ang iyang pasalamat timailhan sa iyang pagtuo. Ikatulo, tungod sa iyang pagtuo nakadawat siya og hingpit nga kaluwasan.
Mapasalamaton kaayo ang dakodako sa armadong kusog sa Sirya nga si Naaman kay naayo siya sa iyang pagkasanlahon sa dihang naligo siya sa Suban sa Jordan. Buot unta niyang bayran ang Ginoo pinaagi kang propeta Elisa. Apan wala modawat og bayad ang propeta. Hinunoa, naghalad na lang siya og sakripisyo ngadto sa Dios sa Israel. Pasalamat ug pagdayeg sa Dios maoy atong “bayad” ngadto sa Ginoo. Ang grasya man god gasa gikan sa Dios nga walay ikabayad ang tawo.
Apan ang ihalad dili lamang mananap kondili ang mismong kinabuhi, sumala pa sa sulat ngadto kang Timoteo. Gidalit ni Pablo ngadto sa Ginoo ang iyang kaugalingon: “Hinumdomi si Jesucristo, gibanhaw gikan sa kamatayon, kaliwat ni David...Akong giantos ang tanan alang niadtong mga gipili, aron sila usab makabaton sa kaluwasan nga anaa diha ni Jesucristo”. Gipasalamatan ni Pablo ang Ginoo pinaagi sa pagduyog niya sa kamatayon ug pagkabanhaw ni Jesus diha usab sa iyang kaugalingong kalisdanan.
Kita usab mopasalamat sa Dios sa iyang mga gasa nga gihatag kanato. Dili gyod kini maihap ug kanunayng mag-una ang Ginoo. Ang labing taas nga paagi sa pagpasalamat sa Dios mao ang Misa kon ang Eyukaristiya. Gani ang Eyukaristiya gikan sa pinulongang Griyego nga gipasabot “pasalamat”.
Mapasalamaton ba kita sa Dios sa tanang panahon ug sa tanang mga butang?