NAGKITA mi sa akong higala nga nagtudlo og communication sa Cebu Institute of Technology-University (CIT-U) nga si Dino Tabaña sa Camma Awards 2019. Among topic parte sa amoang bisyo kaniadto, biseklita. Nakahuna-huna siya sa pagbalik og gamit og folding bike alang sa urban riding.
Matod pang Dino nga lisod na kaayo ang iyang oras alang sa pagbiseklita og layo tungod sa ka busy. Pareho nako, pabor kaayo siya sa folding bike alang sa urban riding tungod sa maayo niyang geometry. Ako siyang giingnan nga way makalupig sa folding bike kon urban riding na ang hisgutan tungod sa iyang height ug geometry, labina karon nga grabe na kaayo ang kahimtang sa traffic.
Base sab nako ni sa akong experience sa pagsigeg tindak sa kadalanan nga magsuotsuot sa naglinya nga mga sakyanan. Sama sa akong usa ka kauban nga nag mountain bike samtang ako nag-folding bike nga 16-inch ang wheelset. Pag-abot nako sa balay, mao pa say pag-abot niya. Dapat, mag-una unta siyag abot kay mas duol ang ilaha sa amoang gigikanang lugar. Ang amoang mga balay mga 5 kilometros ang distansya.
Sukad ato, ang iyang folding bike na ang iyang gigamit sa amoang mga tindak sa siyudad. Nalingaw usab siya kay iyang gipang-upgrade ang bike, sama sa pag-ilis og nipis nga ligid nga sama sa road bike. Iyang gipadak-an ang crankset ug uban pa sa drive train.
MAKALINGAW
Lahi sa MTB, ang makalingaw sa folding bike kay makakita ka ra og barato nga mga piyesa nga durable alang sa urban riding. Mahimo gani nga maka-long ride ka sa folding bike base sa amoang kasinatian. Kadaghan na ko naabot og Danao City nga folding bike lang ang gamit but ang ngipon sa plaka kay 53.
Naa pay uban nakong mga higala nga ilang gi-set up ang ilang folding bike nga sama og road bike. Gikan sa kunat sa speed, ngadto na sa pagka sprinter. Kon anad ka og sikad, ang 30kph nga speed kaya kaayo sa upgraded 20-inch folding bike.
Si Dino nga hilig og old school road bike frame, but ilisan ang parts og bag-o, nakakita usab sa kaanindot sa folding bike alang sa urban riding.
MAHAL PUD
Di tanang folding bikes barato kay naa say mahal nga branded. Ang Dahon lang gani, tag P18,000 ang sagad sa akong nakit-an. Ang akong higalang architect gipadad-an sa iyang igsuon sa Canada og Brompton folding bike nga tag P60,000 diri sa Pilipinas.
Ang Brompton maoy dunay labing maayo nga fold base sa akong experience. Gisabak ra sud sa taxi sa akong higala ang bike human namo og ride. Mao na ang nakanindot sa folding bike kon urban riding ang hisgutan.
Naa pa ba kahay collection sa best brands ang akong higalang si Jay Garganera?