LAPAS na sa tungang gabii ug mingaw na ang mga balay sa mga molupyo sa Kanturagas nga nahinanok na niadtong orasa nga takdol ang bulan. Apan nagtukaw pa si Bador nga diha sa ilang natad, naglingkod sa lantayng kawayan. Nahikatulog na si Myrna, iyang asawa, ug ang bugtong nilang anak nga si Boyet nga siyete anyos pa ang panuigon.
Gisandig niya sa haligi sa lantay ang Garand nga riple nga maoy gi-isyu kanilang mga sakop sa CAFGU gikan sa kadagkuan sa militar sa ilang lungsod. Ang ilang baryo sa Kanturagas maoy sagad hugpaan sa mga rebeldeng NPA. Milanat na ang tulo ka bulan nga ang mga binuhing hayupan sa Kanturagas, sama sa mga baka, kabaw, baboy, kanding, kalit lang nga mangahanaw. Daghan ang nanagtuo nga gipanguha kini sa mga rebeldeng NPA. Apan alang kang Bador adunay mangtas sa Kanturagas nga maoy responsable sa pagkahanaw sa mga hayupan sa baryo nga maatol gayud kon takdol ang bulan.
“Dili mga tawong rebelde ang nangawat sa nangawalang baka, kabaw, baboy ug kanding sa atong baryo Myrna,” matod ni Bador sa iyang asawa. “Aduna gyuy mangtas sa atong baryo!”
“Kuyaw kon ang atong binuhing kabaw, baka, kanding ug baboy maoy sunod biktimahon sa giingon mong mangtas, Bads!” May kabalaka ang tingog ni Myrna.
“Kinahanglan gamiton ko ang akong pagka ‘sharp shooter’ sa atong baryo pinaagi ning Garand nga riple. Hutdon kos ulo sa mangtas ang mga bala ning akong riple, Myr!”
“Unsa man nang mangtasa diay, Pa?” Misagbat si Boyet nga naminaw diay sa gipanagsultihan nilang Bador ug Myrna.
“Dakong sawa, Dong Boyet! Manunukob sa dagkong hayop matag takdol sa Bulan.
NAHAIGPOT si Bador. May nabati siyang kasikas sa atbang sa dakong punoan sa kaymito nga gipauran niya sa turong kabaw ug sa dakong punoan sa mangga nga gipauran niya sa gatasan ug laking mga baka. Mibahihi ang mga kanding ug miagmod ang mga baboy.
Wa gyud masayop si Bador. Sa dan-ag sa takdol nga bulan nasugat sa iyang panan-aw ang higanteng sawa nga ang gidak-on sama sa dakong punoan sa tugas. Gikak dayon ni Bador ang Garand ug gipunting ang ulo sa dakong sawa nga andam nang mobalikos sa kabaw aron pagtukob niini. Milanog ang sagunsong buto-buto matag inggansa ni Bador sa Garand. Gihurot gyud niya ang tanang mga bala sa magasin sa Garand ngadto sa natusak-tusak nga ulo sa dakong sawa.
Daw nauyog ang yuta sa Kanturagas sa paglimbag-limbag sa higanteng sawa nga hinayng midalhap pagkamang paingon sa unahan. Wala matukob ang turong kabaw ug ang mga baka ni Bador.
Pagka ugma naukay ang mga molupyo sa Kanturagas, kay sa tiilan sa bukid paingon sa ganghaan sa dakong langob nakit-an nga nagbuy-od ang taas kaayong lawas sa higanteng sawa nga wala nay kinabuhi. Milampos si Bador sa pagpatay sa mangtas sa Kanturagas. (KATAPUSAN)