GAWAS sa drama, komedi, aksyon, love story ug pantasya, bentang-benta sab natong mga movie fans ang horror nga pelikula.
Ambot nganong ganahan man kaayo ta nga mahadlok, makuyawan, makalitan hangtud nga maka-syagit na lang ta sa kakulba.
Karon nga hapit na usab ang halloween naay duha ka makahahadlok nga pelikula nga angay natong atangan. May kalambigitan sa ilang pinuy-anan ang mahimong dagan sa ilang istorya. May mga itom nga ispiritu o mga sakop sa demonyo ag ilang atubangon.
Ang pelikulang “The Heiress” bitoonan nilang Janella Salvador, Jane de Leon, McCoy de Leon, Sunshine Cruz ug Maricel Soriano.
Mahitungod ni sa usa ka mamamarang ang sugilanon ug kon kinsa ang mahimong kabinlan niya sa pagka-mamamarang. Dugay naman tang nakadungog og ingon aning klase nga sugilanon sa atong mga katiguwangan.
Kinsa kahay binlan ni Maricel Soriano: si Sunshine Cruz ba o si Janella Salvador?
Ang pelikulang “The Heiress” sa direksyon ni Frasco Mortiz gikan sa Regal Entertainment Inc.
Ang Star Cinema may pambatong horror movie usab nga istorya sa duha ka pamilya nga nahimo nilang pinuy-anan ang haunted house.
“Hellcome Home” ang ulohan niini ug sa titulo pa lang may kalambigitan na ang impierno sa ilang kinabuhi.
Ang mga bida dinhi si Romina sa “Kadenang Ginto” Beauty Gonzales, nga bag-ohay lang mihadlok kanato sa iWant series nga “Abandoned”.
Bana niya si Raymond Bagatsing nga nahimo sab nga kapareha ni Beauty niadto sa usa ka teleserye.
Bida usab ang guapang anak ni Almira Muhlach nga Alyssa Muhlach nga makita karon sa seryeng “Pamilya ko”.
Gibituonan ni sa paboritong leading man ug Kapuso star Dennis Trillo. Makaingon ta nga paborito kay kapila na siya nahimong leading man sa mga pelikula sa Star Cinema. Ay’g saba!