MIHAKOT og upat ka gold medals si kanhi University of Athletics of the Philippines (UAAP) MVP trackster John Lloyd Osario aron pangulohan ang dominasyon sa University of San Carlos (USC) sa Cebu Schools Athletic Foundation Inc. (Cesafi) track and field competition nga nahuman kagahapon sa Cebu City Sports Center.
Ningpatigbabaw ang USC sa men’s standing pinaagi sa unofficial 12-6–3 gold-silver-bronze medal tally.
Si Osario, kinsa lumad nga taga lungsod sa Alcoy, Cebu, naghari sa 400m ug 800m run ug sakop siya sa USC team nga ningpatigbabaw sa 4x400m ug 4x100m relays.
Mao kini ang labing unang higayon nga misalmot si Osario sa Cesafi competition nga iyang gihulagway nga lisod dag-on.
Nagkanayon si USC head coach Arvin Loberanis nga mao kini ang labing unang higayon nga nasakmot sa tunghaan ang men’s division overall crown.
Nagsunod sa USC mao ang University of Cebu (UC) nga adunay 4-7-6 medal tally dayon nagsunod ang University of Southern Philippines-Foundation (USP-F) nga adunay 1-4-7 medal tally.
Sa women’s division, grabe kasikit ang kompetisyon ug ang resulta na lang sa katapusang event nga mao ang 3,000-meter women’s walk mao ang makadeterminar sa kampiyon. Sa press time, wala pa nahuman ang 3,000-meter women’s walk.
Ang University of Cebu (UC) kasamtangang nag-una nga adunay 6-3-5 medal tally unya nagsunod ang USC nga adunay 5-9-4 medal tally.
Sa high school division, ningpatigbabaw ang UC sa boys ug girls division. (RSC)