GIKATAHO nga nagtinguha na si American Floyd Mayweather Jr. nga makig-away og balik kang Manny Pacquiao human kini miatras sa pagpakig-negusasyon sa Hong Kong boxing group DEF Promotions.
Si Mayweather, 42, nakig-negusasyon og sugod sa DEF niadtong Hunyo alang sa usa ka exhibition bout nga ipahigayon sa China.
Mao unta kini ang ikaduhang exhibition bout nga sagubangon ni Mayweather human niya gipaundang sulod lang sa 1st round si kickboxer Tenshin Nasukawa sa miaging Bag-ong Tuig.
Nagkanayon si DEF Promotions director ug promoter Jay Lau nga sulod na sa duha ka mga higayon nga mibisita si Mayweather sa Hong Kong alang sa negusasyon.
Apan nausab ang hunahuna ni Mayweather ug giingong nakadesisyon kining makig-away sa ikaduhang higayon batok sa Pambansang Kamao ng Pilipinas.
“Mayweather came two times to Hong Kong,” matod ni Lau sa interbyu sa The Sun.
“He spoke with my son Jayson and we had communications but now he is focussing the Pacquiao rematch. We were talking about an exhibition in China, a big event but not a recorded professional boxing fight. Something like Mayweather vs Tenshin in Japan.”
Nidugang si Lau nga natingala na lang siya nga nausab ang desisyon ni Mayweather ug gusto na kining makig-away og balik kang Pacquiao.
“We spoke a bit about doing a special fight in China, but half way through he turned to the Pacquiao rematch so we stopped,” asoy ni Lau.
Gilupig ni Mayweather pinaagi sa unanimous decision si Pacquiao sa premiro nilang away niadtong 2015 sa labing dakong away sa kasaysayan sa boksing kon hisgutan ang pinansyal nga aspeto.
Human sa away, gibutyag ni Pacquiao nga naangol ang iyang tuong abaga sa tungatungang bahin sa kombati hinungdan nga wala kaayo niya kini nagamit.
Si Pacquiao taodtaod na sab nga mihagit kang Mayweather nga mag-away sila’g balik apan wala misanong si Mayweather.
Ning higayuna, nausab na ang dagan sa estorya ug daw nagpakita na og interes si Mayweather kabahin sa rematch.
Kon madayon man ang gikantapang rematch, masaligon lang gihapon si Lau nga iyang mahaylo si Mayweather nga moaway’g exhibition bout sa China sa ugma damlag.
“I’ll let him do his thing with Manny,” matod ni Lau, “The rematch is the biggest thing that can happen, so why bother with the exhibition bout first? If that happens we will stop everything and let him do his thing first.”
Mismong si Lau nanghinaot nanghinaot nga madayon ang rematch sa duha sa labing bantugang mga boksidor sa kalibutan sa tanang mga henerasyon. (ESL)