Kamingaw sa inahan natambalan

■ liwat: Usa ka gasa gikan sa kahitas-an ang miabot sa magtiayong Chloe ug Jessa Cantunao. Ang bata nga ginganlan og Cathalea maoy nakatambal sa kamingaw nga gibati ni Jessa sa mipanaw niya nga inahan nga si Mama Bingbing nga mao ang iyang giangga sa iyang unang liwat. / (Tampo nga mga hulagway)
■ liwat: Usa ka gasa gikan sa kahitas-an ang miabot sa magtiayong Chloe ug Jessa Cantunao. Ang bata nga ginganlan og Cathalea maoy nakatambal sa kamingaw nga gibati ni Jessa sa mipanaw niya nga inahan nga si Mama Bingbing nga mao ang iyang giangga sa iyang unang liwat. / (Tampo nga mga hulagway)

GIBATI og grabe kamingaw sa iyang inahan si Jessa Mae Sotto-Cantunao dihang iyahang gihimugso ang unang liwat niya niadtong Agusto sa Chong Hua Hospital sa dakbayan sa Mandaue.

Mas na-appreciate ni Jessa ang gugma sa iyang inahan nga si Columba Sotto dihang siya nahimo usab nga usa ka inahan.

Niadtong 2017, namatay ang iyang Mama Columba sa aneurysm sa panuigon nga 65.

“Although, wala siya kakita sa iyang apo, pero maghandom gihapon (ko) nga uban siya nako permi ug wala ko niya pasagdii labi na karon nga inahan na ko,” paambit ni Jessa, 23.

Lima ka buwan na ang iyang tiyan dihang iyang nahibaw-an nga nagsabak diay siya sa unang anak nila sa iyang bana nga si Chloe Cantunao, 24.

Sa wala pa siya mahibawo nga buntis diay siya, niapil pa og pilgrimage si Jessa nga gitawag og El Camino de Santiago de Compostela sa lungsod sa Compostela niadtong Pebrero ning tuiga.

Sa pilgrimage, nagbaktas sila og 28 ka kilometros agi sa mga bungtod sud sa duha ka adlaw.

Dihang nag-labor na si Jessa hangtod nga si gidala sa delivery room, wala niya gibuwag sa iyang position ang novena sa Lord of Pardon.

Niadtong Agusto 17, 2019, usa ka himsog nga batang babaye ang gipakatawo ni Jessa pinaagi sa normal delivery alas 11:36 sa gabii. Kini nitimbang og 2.64 ka kilo.

Dihang nahibawo siya nga duna na diay siya gidaladala nga bata sud sa iyang sabakan, gibati siya og kahadlok sa kadako sa responsibilidad nga iyang atubangon isip usa ka inahan, maatiman ba niya og tarong ug matagaan ba niya og nindot nga kaugmaon.

Mas nipatigbabaw ang iyang kalipay nga gibati kay usa ka dako nga grasya sa Ginoo ang iyang nadawat.

Uban sa gabay sa Labaw nga Makagagahom, sa iyang pamilya, ni Chloe ug labaw sa tanan kon giunsa siya pag-amuma, pagpangga ug pagmahal sa iyang Mama Columba, masaligon si Jessa nga mapadako niya ang bata nga usa ka buotan ug sulundon nga bata.

Niadtong Septiyembre 22, 2019, gibunyagan ang bata ni Msgr. Ildebrando Leyson sa Archdiocesan Shrine of St. James the Apostle sa lungsod sa Compostela, amihanang Sugbo. Ang bata ginganlan og Cathalea.

Apil sa mga ninong ug ninang sila si: Jefferson Sotto, Lorraine Mitzi Ambrad, Michaela Jaycel Dolores, Charmine Longakit, Kizzia Czarina Hernando, Vanisa Soriano ug Mark Angelo Biscaida.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph