NASIGNIT sa awtoridad sa Lupon, Davao Oriental ang Top 2 Most Wanted sa dapit niadtong Biyernes, Oktubre 11.
Dinakpan giila nga si Jonathan Quer Collamar, 39, mag-uuma, nagpuyo sa Purok 1, Barangay New Visayas, Lupon, Davao Oriental.
Hiniusang pwersa sa Lupon Municipal Police Station, Davao Oriental Police Provincial Office, Criminal Investigation and Detection Group Davao Oriental Regional Field Unit (CIDG DORFU), 1101st Regional Mobile Force Battalion, ug 2nd Davao Oriental Police Mobile Force Company miaresto kang Collamar sa Purok 4 sa maong barangay, alas 9 sa buntag, Biyernes.
Si Collamar may kasong three counts sa qualified rape nga way piyansang girekomendar, diin ang warrant of arrest giisyu ni presiding Judge Emilio G Dayanghirang III sa Regional Trial Court-Davao, Branch 32 sa 11th Judicial Region, Lupon, Davao Oriental niadtong Septyembre 9, 2019.
Ang dinakpan maoy gitudlong mimolestiya sa iyang step-daughter sud sa kapila ka beses kung wala ang iyang inahan.
Suma sa biktima, 2013 gisugdan siya og lugos sa iyang ama-ama dihang 6 anyos pa siya. Niya kapila ka beses siyang gihilabtan sa iyang ama-ama, apan tulo ka insidente lamang ang iyang mahinumdoman, diin ang uwahi niadtong Oktubre 2018.
Ang suspek anaa na’s kustodiya sa Lupon Municipal Police Station. (RGV)