TAGUM CITY, Davao del Norte -- Ang nakuhang footage sa closed circuit television (CCTV) camera mao ang ebidensiya nga gitutukan sa kapulisan aron sulbaron ang krimen sa nahitabong pagpamusil sa provincial information officer sa Davao del Norte ug magsisibya ug tag-iya sa 99.9 RP FM sa Purok White Dove, Barangay Visayan Village, alas 8:05 sa buntag, Biyernes, Oktubre 11.
Sumala pa, ang biktima nga si Paterno Lucero Pacquiao, 54, minyo, molupyo sa nahisgutang dapit, gipusil sa wala mailhing armado samtang padung nga mosulod sa iyang balay gikan sa iyang programa sa radyo sakay sa kolor puti nga Ford Eco Sport nga adunay plaka nga NAT 5458.
Ang biktima anaa sa luwas nga kahimtang sulod sa balay tambalanan sa siyudad ug nakaangkon og samad sa tuong bahin sa abaga.
Gisaysay ni Pacquiao dihang nahinabi sa Superbalita nga wala siyay matumbok nga tawo o kaaway nga maoy posibleng mipusil kaniya sanglit wa man siyay nadawat nga hulga sa iyang kinabuhi o nakabangi nga tawo.
Nanghinaut ang biktima nga mailhan ug madakpan ang responsable sa pagpusil kaniya sanglit itugyan na lamang niya sa kapulisan ang kasulbaran sa maong krimen.
Sa gihimong pakipaghinabi kang Police Lieutenant Colonel Ariel Baybay Acala, ang chief of police sa Tagum City Police Station, gibutyag niini nga ang insidente nakuhaan og CCTV footage diin makita ang suspek nga mipusil sa biktima nga nagsakay og motor. Ang drayber naka-helmet ug nagsul-ob og jacket nga itom samtang ang backrider nagsul-ob og sunglasses, nakamaskara nga gitabunan ang baba ug ilong, ug nagsul-ob sab og jacket nga blue.
Matud pa, ang footage maoy usa sa mga tutukan sa kapulisan aron ilhon ang mga suspek.
Blangko pa hinuon ang mga awtoridad sa kasamtangan sa motibo sa krimen.
Narekober gikan sa crime scene ang duha ka mga basiyo sa bala sa kalibre .45 nga pistola, usa ka balinis, ug usa ka buhing bala.
Matud ni Acala, ikaduhang kaso sa pagpamusil sa siyudad sa Tagum ang nahitabo kang Pacquiao sulod sa bulan sa Oktubre.
“Ang unang kaso pagpamusil kadtong pulis namo nga gipusil sa iyang tindahan sa ilang balay niadtong Dominggo, 6 sa Oktubre. Buhi gihapon to. Wala naintimano ug ikaduha ni kang Pacquiao,” dugang saysay ni Alcala. (Dexter T. Visitacion)