DUHA ka mga babayeng nangabilanggo kanhi sa pagpamaligya og illegal nga drugas mahibalik sa bilanggoan human sila madakpi sa buy-bust operation sa Phillippine Drug Enforcement Agency (PDEA)-7 sa Sitio Paradise 3, Barangay Kinasang-an, Siyudad sa Sugbo.
Nibalhin pa og pinuy-anan ang duha ka mga suspek ug nagpahuwam og kwarta sa mga silingan, apan pantalya ra diay, matod sa PDEA 7.
Si Leia Alcantara, tigpamaba sa PDEA 7, niila sa mga suspek nga sila si Baby Rose Rama, 28, ug iyang ig-agaw nga si Mae Villanueva, 29. Sa buy-bust, nasakmit ang 35 gramos nga shabu sa manag-agaw.
Sila si Rama ug Villanueva mga taga Barangay Calamba, usa sa mga dapit sa Siyudad sa Sugbo nga dako og problema sa illegal drugs.
Mobalor sa 25 gramos ang gipalit sa nagpailang posuer-buyer nga mokantidad og P46,000 gamit ang boodle money nga dala sa nagpakaaron ingnong mopalit.
Gawas sa 25 gramos, duna pay lain nga nasakmit ang ilang operating team nga 10 gramos nga mokantidad tanan og P230,000 base sa Dangerous Drugs Board (DDB) value.
Dugang ni Alcantara nga moabot sa 300 ngadto na sa tunga sa kilo ang mabaligya sa duha ka mga suspek.
Usa ka informant ang nakadiskobre sa pagpamaligyag illegal drugs sa duha.
Matod ni Alcantara nga sila si Rama ug Villanueva nadakpan na kaniadto ug napriso sa samang kaso sa pagpamaligya ug paghupot og drugas.
Si Rama niadtong Mayo pa lang nakagawas sa Cebu City Jail samtang si Villanueva niadtong milabay nga buwan nakagawas sa Talisay City Jail.
“Nagkunsabo na gyud hinuon sila. Aron dili mahibaw-an, nangabang sila og kwarto,” matod ni Alcantara.
Ang mag-agaw nga Rama ug Rivera lumad nga taga dan A. Lopez, Barangay Calamba, apan nangabang og lawak sa usa ka balay sa Barangay Kinasang-an.
Usa sa mga nasilingan sa duruha nitug-an nga mga tigpatanto ang pagpaila kanila sa duha, sama sa 5-6.
Wa sila magtuo nga sila si Rama ug Villanueva drug pushers. Duna silay silingan nga nakautang og P5,000 gikan sa duha.