Nanamilit na sa iyang mga ginsakpan ug mga opisyal sa Dakbayan sa Talisay si P/Major Orlando Carag, Jr., hepe sa kapulisan sa siyudad.
Si Carag mobalhin na sa National Capital Region Police Office (NCRPO) kay dad-on siya ni Brig. General Debold Sinas.
Si Sinas gihugonhugon nga maoy mangu sa NCRPO atol sa mga lahugay sa kadagkuan sa Camp Crame.
Atol sa Public Safety Night, gipasalamatan sa kapulisan ang Talisaynon sa ilang suporta.
Si Talisay City Mayor Gerald Anthony “Samsam” Gullas Jr. nagpasalamat usab sa nahatag nga serbisyo ni Carag.
Sa mensahe ni Gullas, iyang gipasalamatan si Carag sa duha ka buwan nga pagduma sa kapulisan sa siyudad.
Ubos sa pagpangu ni Carag, dunay nadugang nga police community precincts sa Barangay Lawaan 2 ug Barangay Bulacao, habig sa Dakbayan sa Talisay.
Dali ra ang pagtubag sa mga alarma human sa pagkamugna sa duha ka mga buhatan. Dugang pa sa mayor nga kon kinsa man ang mohulip ni Carag, dawaton nila nga sama sa pagdawat kaniya. Makapaabot ang mohulip nga police official sa padayon nga suporta nga ihatag niya.
Hagit ni Gullas nga kon kinsa ang mabutang nga bag-ong hepe, magsul-ob kini og “dakong sapatos” kay mao kini ang gibiyaan ni Carag.
Si Sinas, sa iyang bahin, ningon nga magpadayon ang suporta sa kapulisan sa administrasyon ni Gullas. Ila usab nga ipadayon ang suporta sa kabataan sa Barangay Tangke, ang lugar sa Talisay nga dunay dakong problema sa illegal drugs. ( BBT)