BISAN kon mag-uwan, duha ka dagko nga mga kalihukan karong adlawa alang sa kapistahan sa Siyudad sa Talisay, magpadayon.
Ang duha mao ang seaborne procession ug Halad Inasal Festival.
Di makapugong sa himuon nga fluvial procession sa Talisay City karong buntag, Oktubre 13, kon mag-uwan, sama sa nangaging mga adlaw.
Si Mikki Aznar, officer-in-charge sa Talisay City Tourism Department, niingon nga bisan sa mga pag-uwan, sa ilang pag-obserbar sa kadagatan, way angay nga kabalak-an.
Sabado sa hapon, Oktubre 12, gihimo ang Traslacion, diin ang imahen ni Sta. Teresa de Avila gidala sa Laray, San Roque nga simbahan.
Dinhi na manukad alang sa himuon nga procession nga sugdan sa Talisay Fish Port.
Molahos ang procession sa kadagatan sa Barangay Pooc, dayon balik sa Barangay Poblacion. Hinuon gipasidan-an na ang mga mosalmot nga mosunod lang sa mando sa taga Bantay Dagat aron kalikayan ang disgrasya.
GIDID-AN
Samtang subli nga gipahinumduman ang publiko nga gidid-an una sa pag-agi ang mga bus ug mini bus sa South Coastal Road karong Dominggo, Oktubre 13, gikan sa alas 12 sa udto hangtud na sa alas 5 sa hapon.
Kini alang sa street dancing nga magsugod sa dan atubangan sa Talisay City Hall, padung na ngadto sa Talisay City Central School sa Barangay Poblacion.
Ang lane sa South Coastal Road nga agian sa mga sakyanan padung sa habagatan, habig sa Talisay City, himuon nga two-way, alang sa mga light ug delivery vehicle.
Gilantawan ang paghuot sa trapiko sa maong mga lugar.
Nipasidaan na daan si Jonathan Tumulak, pangulo sa City of Talisay Traffic Operations and Development Authority (CT-TODA) nga planuhon daan ang mga byahe sa maong dapit.
Mas maayo nga sayuhon o sa gabii na himuon ang pagbyahe. Adunay 11 ka contingents ang mosalmot sa Halad Inasal Festival.
Lima gikan sa elementary, upat sa sekondarya, usa gikan sa Talisay City College ug usa gikan sa Talisay City hall.
Ang lakip lang sa tigi ang contingent nga gikan sa elementarya ug sekondarya.