Bitin mibabag sa dan sa Biasong, nadakpan

■ DAKPAN: Way pupanaganang gidakop ni Anthony Abapo ang siyam ka tiil nga sawa nga mibabag sa usa ka dan sa Barangay Biasong, Dakbayan sa Talisay. / (Tampo)
■ DAKPAN: Way pupanaganang gidakop ni Anthony Abapo ang siyam ka tiil nga sawa nga mibabag sa usa ka dan sa Barangay Biasong, Dakbayan sa Talisay. / (Tampo)

DAKONG bitin nga nag-ali sa dalan sa Barangay Biasong, Siyudad sa Talisay gi-rescue.

Maisugong gikuha ni Anthony Abapo, focal person sa Pooc Elementary School sa Disaster Risk Reduction and Management, ang bitin.

Nasuta nga usa kini ka reticulated phyton kun sawa.

Nabantayan ang bitin sa alas 11 sa Huwebes sa gabii, Oktubre 10 nga nakapahadlok sa mga lumolupyo.

Dali kini gi-rescue ni Abapo ug gi-turnover ngadto sa Talisay City Diaster Risk Reduction and Management Office, Biyernes sa buntag, Oktubre 11.

Ang sawa adunay gitas-on nga siyam ka tiil.

Matud ni Alvin Santillana, pangu sa CDRRMO, di poisonous ang maong klase sa bitin.

Apan di sab kakumpyansahan kay kusgan mobalikos sa bisan unsa o kinsa nga gusto nga kan-on.

Sa dihang gisusi kon aduna bay nanag-iya o nagbuhi sa bitin, way si bisan usa nga niangkon nga ila.

Nagtuo si Santillana nga posibleng wild ang bitin.

“Agresibo kaayong bitina mura ba siya og gigutom,” asoy pa ni Santillana.

Hinuon way gikataho nga mga mananap nga binuhi sa lugar diin nakit-an ang bitin nga nawala o napaakan ba.

Wa usay mga tawo nga napaakan ang bitin. Human sa gihimo nga pagpakisayod ug nga way niangkon nga ila kining binuhi, gi-turnover ra sab ang bitin sa City Environment and Natural Resources Office (CENRO). (FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph