LIMA ka mga pamilya gipabakwit gumikan sa peligro mugna sa pagkahugno sa pader sa gitrabahong housing development sa Sityo Sugarlandia, Barangay Bacayan, Dakbayan sa Sugbo.
Si Mayor Edgardo Labella, kinsa personal nga nisusi sa lugar, nipahunong sa pagtrabaho sa 20 ka one-storey apartments.
Iyang gimanduan ang tag-iya nga si Jess Carlo Miñoza sa pag-atiman sa nahugno nga parte sa construction, labi na ang pader nga nisandig sa mga balay nga nahimutang sa kilid sa ilang gitrabahong edipisyo.
Si Barangay Kapitan Zenaida Colina niingon nga gibalhin sa tag-iya sa property ang mga pamilyang apektado ngadto sa luwas nga lugar sa Bacayan.
Way gika-report nga naangol sanglit igo rang nisandig sa mga balay ang pader ug ang ubang bahin nahagsa alas 5 Sabado sa buntag, Oktubre 12.
“Diha mi sa sulod balay unya nangatulog pa ang mga bata, ako nagmata na ko. Nakadungog ko og kasikas nga naay matumba unya paggawas sa akong bana, kana naman diay nahugno,”asoy ni Lily Caratayco.
WAY BUILDING PERMIT
Base sa impormasyon gikan ni Architect Florante Catalan, sa Office of the Building Official, way building permit ang pagtukod sa 20 ka one-storey apartment.
Wa say consultant ug engineer nga nag-supervise sa trabaho, dugang ni Catalan.
Si Labella kinsa nakakita sa construction site nihulagway nga huyang ang mga dapat sa pader nga delikado sa mga balay nga naa kilid sa property ni Miñoza. / (PAC)