BAGUIO

Luzano: Imahe ti kapulisan, namulitan manen

Karit Ken Kayetket

‘NIA metten a gasat, kunada... sipud timmugaw ni Pres. Duterte...agsasamusamen dagiti mulit iti kapulisan gapu iti kampanya kontra illegal a droga. Sipud naipasngay ti “tokhang” nagririgudonen dagiti pasamak a nangipababa iti dignidad dagiti otoridad. Ngamin, kuna dagiti observers...adda dagiti naglablabes iti akem...adu dagiti naitudo a nagaramid iti saan a maiparbeng iti annuroten ti “Tokhang”.

Adu kadakuada (otoridad) ti nadusan ken naikkaten iti serbisyo, adu pay dagiti sumangsango pay laeng iti agkakawil a darum. Kinapudnona, gapu iti kampanya kontra illegal a droga, dimmanonen agingga iti ballasiw taaw ti pannakabusisi ti agdama nga administrasyon. Ngem saan a namki ti programa ni Pres. Duterte kontra droga. Kayatna a masudek daytoy ken kagiddan met ti pannakadusa kadagiti otoridad a naglabsing wenno naglablabes iti takem. Ngem ti kabaruan a mulit ket ti naibutaktak a napasamak idi 2013 a rimmusingan dagiti “Ninja Cops” gapu iti recycling ti droga.

Kayatna a sawen a paset dagiti makumkumpiska a droga babaen kadagitoy a pulis ket mailaklako manen iti kagimongan katukad ti binilyon a kantedad. Nabuko ti nakuna nga aramid. Daytoy ita ti eksena kadagiti Senate hearings a mapaspasamak. Ti imasna...nagbalinen a gubatan dagiti heneral ti nasao nga imbestigasyon. Ngem sakbay a sukayentayo manen daytoy a kontrobersiya...intay man pay taldiapan dagiti sumangka-kontrobersiya met a paspasamak itay nabiit:

***

Umuna, kudos iti misyon ni Pres. Duterte sadiay Russia. Adu manen a pagimbagan ken suporta ti Russia ditoy pagilian iti nagduduma nga aspeto iti panagdur-as ti napasingkedan iti nagbaet ti dua a pagilian. Saluduanmi ti plano a naikrukis iti saritaanda (Duterte/Putin) panggep iti pannakailukat ti ridaw ti Pilipinas para iti “oil exploration” ti Russia no laketdi ta saan a kadagiti pagiinnagawanda a teritoryo. Dakkel daytoy a makatulong iti pagilian no matuloy, kuna ti kaadduan nangruna kadagiti ekonomista.

In short..amangan ta ditayton agangkat iti petroleum products no di ketdi datayton ti ag-export. No dumakkel ti dollar reserves ti pagilian, ditayton agutang, saan aya? Nupay, awan pay konkreto a dokumento iti saritaan ti pa-empleo, kas kuna ni Labor Sec. Bello, dakkel a gundaway para kadagiti kailiantayo ti makapagtrabaho sadiay Russia gapu ta addan pammalubos ken napagsaritaandan daytoy iti nakuna a misyon. Ngem no sibibiag daydi lolok, mabalin nga agruppanget daytoy. Ngamin...ammona a naasidegtayo kadagiti nasyon (kas US) a medyo saan unay a nadekket iti Russia. Idanagan ni lolok no kas pangarigan ta agbaliktad dagiti pasamak ket gubatennatayo kano ti China, sino ngata ti mangisakit: US wenno Russia? Saan ngata a mas kumarkaro ti gubat? Adda punto ni lolok, saan aya pards? Ti laeng banglesna, no ibusenen ti Tsina ti oil reserves ti Pilipinas tangay nagdappatdan kadagiti teritoryotayo...addanto pay ngata mabagi ti Russia a pakibingayanto ti Pinas? He he...ditay pay masungbatan dagita, pards, ta makumikonda pay laeng iti imbestigasyon ti “Ninja Cops”, saan aya lolong? Ti laeng pakaassiak kenni lolok ket ti baro a bill idiay Kongreso kontra kadagiti bungangera a misis...ta uray no agbalinto a linteg, awanen daydi lolak a lima-pulgada ti ngangawna! He he Joke!

***

Umad-adu dagiti matiltiliw a gangannaet, kaadduan ket Chinese Nationals... gapu iti illegal a panagtrabaho ditoy pagilian nga awanan permiso. Gasuten dagiti nariput ken nakassuan. Ti imasna, dakkel a pilay iti trabaho dagiti GRO a Pinay ti naibulgar a gasut met gayam dagiti gangannaet ti adda ditoy pagilian a maibugbugaw kano kadagiti kustomers iti naduma-duma a disso nangruna dita NCR. Tsk tsk...dakkel daytoy a karit kadagiti otoridad. Imbes a mapasardeng ti prostitusyon ditoy pagilian, kasla manaynayonan pay ketdin gapu iti pannakaibulgar nga adu gayamen dagiti gangannaet a simreken iti prostitusyon. Kunada a dagiti kano met laeng kailianda (Chinese) dagiti kustomersda. In short...saan la gayamen a sugal ti simrekanda a negosyo ditoy pagilian no di ketdi adda payen prostitusyon malaksid pay iti panagpautang ken panagkidnap kadagiti saan a makabayad. Sapay koma ta saanen nga agramaram ti nakuna a banag ta isu manen a pakaidadanesan iti imahe ti pagilian. Saludsod: ania kano aya ti nagdumaan ti serbisyo dagita a gangannaet a GRO ken kadagiti lokal a kailiantayo? He he...dakayon ti mangammo no ania ti ramanna.

***

Good news, kunada: addan kari ti gobyerno para iti kanayonan a sueldo dagiti mannursuro. Immuna a nayanunsiyo nga ita a tawen a maited. Sinaruno ti baro nga anunsiyo nga iti masungad pay a tawen nga agipekto. Simngat ti maysa pay a report a medyo agbangking sa ti kari a salary increase agsipud ta awan kano pay ti pundo. Kuna met dagiti legal luminaryo a nairaman kanon ti pondo iti national budget para iti masungad a tawen. Tsk tsk...dayta ket ti rigatna ta nalakada nga agkari a dida pay sinona no adda pondona wenno awan. Natural a manganga manen dagiti nabayagen nga agur-uray nga empleados ti edukasyon. Nayagen ti ilemda kadagiti dadduma nga empleado ti gobyerno kas koma PNP ken AFP a dobladon ti sueldoda. Sa ita, adda pay manen rimmuar a damag a manayonan met ti sueldo dagiti nurses ti pagilian tapno didan pumanaw pay nga agsapul iti panggedan. Haay biag....makipustaankami....inton mauraytayo dayta a kanayonan a grasya (sueldo) masiertomi a magutaygutay manen dayta, saan a maminpinsan a maited kadagiti maseknan. Piman a trabahador ti gobyerno.

***

Naibulgar itay nabiit babaen kenni PNP Spokesman General Bernard Banac nga adda nasurok pitu-gasut (700+) dagiti pulis scalawags ti imon-monitorda iti agdama malaksid kadagiti adu pay a nakassuan ken naikkaten iti serbisyo. Daytoy a bilang ket mabalin a saan pay a karaman dagiti maaw-awagan iti “Ninja Cops” wenno “Agaw Bato Cops”. Iti dayta a report...ditay maikkat ti kumarkaro a disgusto wenno pannakaupay dagiti umili. Ngamin, gapu iti talek ti administrasyon-Duterte kadagiti pannakabagi ti linteg, saan aya a dinoblena pay ti sueldo dagitoy. Arig amin a benepisyoda ket inlatangen ti administrasyon. Ti panggep ti nasao nga addang ket tapno awan koman dagiti agbayabas ken agnegosyo iti illegal kas koma iti illegal a droga, kidnapping, carnapping ken dumna nga aramid. Ngem baliktad sa met ti napasamak? Kasla immadon sa met dagiti simrek iti illegal. Didan malagip ti panangisakit ken talek nga inted ti gobyerno kadakuada.

***

Ti nasakit ti amin ket ti pannakaibulgar ti “Ninja Cops” nga im-imbestigaran itan ti Senado. Ti bangsitna, ditan a nakita ti kaadduan no sinno ken ania ti kinatao dagiti nangangato a turayen ti kapulisan, base kadagiti naibutaktaken nga aramid nangruna iti recycling ti droga sipud pay 2013. Nasurok nga uppat a tawen ti limmabas a kasla nakaturog kano ti kaso dagiti pulis a nairaman iti raid idi 2013 sadiay Pampanga. Saludsod ngarud ni Sen. Drilon: nakailemmenganna ngay wenno nagturoganna ngay dayta a kaso a saan a nakalkal dagiti otoridad ken pangukoman? Adu pay dagiti pasamak a rumbeng a mayammo iti isyu ti Ninja Cops. Masapul nga adda madusa. Ti imasna ngarud, awan sumuko kadagiti maak-akusaran. Ngem ti nalawag...kas kuna ni Sen. Sotto...saan a napasamak ti pannakaibulgar iti buyok dagiti Ninja Cops no di ketdi idi panawen pay ni Ex-P-Noy. Saludsod: apay a pimmaut iti daytoy a panawen nga awan nadusa kadagiti nakaaramid iti krimen? Sinno dagiti opisyal ti kapulisan ti nakaaramid iti cover-up tapno maillemmeng ti kaso. Sadino ngata ti pagtungpalan dagiti imbulgar ni Mayor Benjamin Magalong kontra Ninja Cops (recycling ti droga) ? Sadino met ngata ti panungpalan ti eksena ni PNP Chief Oscar Albayalde? Sapay koma ta iringpasyon ti kontrobersiya ket madusa dagiti rumbeng a madusa. Apektadon ti imahe ti kapulisan. Kaassianyo met dagiti otoridad a nalinis, nadalus ti serbisyoda iti pagilian. Adios mi amor, ciao, mabalos!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph