ANG Philippine Red Cross (PRC) Lapu-Lapu/Cordova Chapter adunay bag-ong hugna sa mga opisyal isip Board of Directors atol sa ilang general assembly sa Mactan Convention Hall niadtong buwan sa Septiyembre 2019.
Kini human nga ang unom sa mga Board of Director miabot na sa ilang duha ka tuig nga termino sa boluntaryo nga pag-serbisyo sa chapter.
Apan gumikan sa pag-usab sa kategoriya sa paglambo niini gikan sa D ngadto sa C, nagkinahanglan na karon ang chapter og 22 ka mga miyembro sa BOD gikan sa 18 ka mga miyembro.
Pito ang gikinahanglan gikan sa Lapu-Lapu ug upat ang gikan sa Cordova, samtang ang nahibilin nga mga miyembro sa BOD, adunay managlahi nga termino nga mosubra sa duha ka tuig.
Matag BOD, nituboy og duha ka mga pili-unon sa pagka Board of Director kinsa mga impluwensyado sa ilang komunidad.
Ang pito nga napili gikan sa Lapu-Lapu mao sila si Michol Anthony Cerna, senior human resource (HR) specialist sa Gaisano Retail; Eric Monsanto, marketing and communications manager sa Blue Water Maribago Resort and Spa; Jeffrey Chua, tag-iya sa NAFLA Food Manufacturing; Dr. Joseph Abing, medical officer 3 sa Department of Education (DepEd) Lapu-Lapu City Division; Jonas Quilantang, chief executive officer (CEO) sa Uniform Solutions Inc.; Norman Mendoza, reporter sa dySS ug correspondent sa Cebu Daily News (CDN) Digital; ug Ferdinand Mañus, reporter/anchor sa dyAB.
Samtang, ang upat nga napili gikan sa Cordova mao sila si Ximgil Dino Sitoy, bise mayor sa Cordova; Remedios Lupo, district supervisor sa DepEd Cordova; Vincent Benitez, pangu sa disaster risk reduction management office (DRRMO) sa lungsod sa Cordova; ug Dr. Efren Dico Jr., medical officer sa Rural Health Unit (RHU) sa Cordova.
Ang bag-o nga mga napiling Board of Director nanumpa ngadto sa vice chairman sa chapter nga si Mayor Teche Sitoy-Cho sa Cordova sa ngalan sa chairman nga si Dr. Mario Amores. (PR)