HUMAN ang kadiyot nga pagpahuway, mibalik with a bang ang Tagum City Chamber Chorale, gipamatud-an nga usa sila sa maayong choral group sa nasud.
Kini human sila mikampeyon sa annual National Government Choral Competition nga gipaluyuhan sa Civil Service Commission.
Gipildi sa grupo ang laing government choral groups gikan Luzon, National Capital Region, Visayas ug Mindanao.
Tungod sa kadaugan nakuha nila ang ikaupat nga championship title.
Ang grupo miangkon sa grand slam victory human giilang kampeyon sa maong kompetisyon sud sa tulo ka tuig, 2015 ngadto 2017.
Enero 2018, ang grupo midaug sab sa una nilang kompetisyon sa Kobe, Japan.
Sa pagbalik sa entablado, ang 30-man choral group nga gilangkuban sa casual ug regular employees sa City Government of Tagum mipailawom sa pagbansay ug ektensibo nga preparasyon alang sa kompetisyon.
Ang grupo midawat og tropeyo ug P200,000 cash prize.
Gikanta nila ang “Gapas” by Eudenice Palaruan nga gisundan sa folk-ethnic “Three Kalinga Chants” ni Nilo Alcala.
Gihatagan sab nila og hustisya ang “Ako’y Isang Lingkod Bayan” nga gi-areglo ni John August Pamintuan, midaug nga Best Arranger of the Contest Piece.
Ang Bangko Sentral Singers sa NCR maoy first runner-up, samtang ang Dasmariñas City Teachers Chorale sa Luzon ug Bayugan City Educators Chorale sa Mindanao nabutang sa 2nd ug 3rd runners-up.
Mga hurado karon nga tuig gilangkuban nila National Artists for Music Mr. Ryan Cayabyab ug Dr. Ramon Santos, uban ang lain pang mga inilang choral arrangers ug clinicians.
Ang National Government Choral Competition usa sa mga aktibidad sa month-long celebration sa 119th anniversary sa Philippine Civil Service. (PR)