KAPAKPAKAN ang gihimo karon sa Ancilliary Services Unit (ASU) sa Davao City dihang sila gyud ang nangusog sa sidewalk clearing operations.
Kauban sa ASU mao ang City Traffic and Transport Management Office (CTTMO), City Engineer’s Office (CEO), kapulisan ug mga opisyal sa barangay.
Kini subay sa gipagula nga Memorandum Circular 2019-121 gikan sa Department of the Interior and Local Government (DILG) diin ang paghatag sa 60-diyas ultimatum sa local government units (LGUs) nga limpiyohan ang mga sidewalks.
“Di lang sila manaog sa gutter para dili sila mag-cause og traffic congestion," ingon ni ASU chief Paul Bermejo.
Tuod man, malampuson ang programa, nahawan tuod ang sidewalk labi na Bankerohan Public Market ug ang ubang mga sidewalks sa mga lugar sa siyudad sa Davao, apan dunay pipila nga di gyod mabangbang, naghinay-hinay na sab sa pagpamalik.
Ang CTTMO nakatala sila og 19 ka lugar nga ilang gipanglimpiyohan ang mga nakaharang sud sa 41 ka mga nailang mga dapit nga dunay mga nakababag sa sidewalk.
Ang maong mga lugar mao ang Roxas Boulevard, Quirino Avenue, Quezon Boulevard, Jacinto Extension, Guerrero Street sa Brgy 24-C, Dacudao Avenue sa Agdao, Kilometer (Km) 7 Bangkal ngadto sa Balusong sa Matina, Bago Aplaya, Bankerohan, Matina, Ulas ngadto sa Talomo, Km's 5 ug 6 sa Buhangin, Angliongto Street, Araullo Street sa Jacinto Extension, Jacinto Street, ug Bangoy Street.
Nalipay ang DILG kay abtik nga napatuman ang mandu. Nalipay sab ang mga tawo kay di na kaayo hasol kung agian kini nga mga dapit kay tawhay naman. Wa na kaayo mga nakaharang.
Maayo kaayo ang pagpatuman, apan unta lamang, dili lang kini karon, balik-balikan unta kini sa mga nahisgutang mga ahensya aron di gayod makapamalik sa kaniadtong sitwasyon ang mga vendors ug ang pag-istrikto sa pag-parking.
Sa mga vendors, unta motuman kita sa balaud, aron hapsay atong palibot.