NIPADAYAG og kaligutgot ang pipila ka nanagiya og sakyanan nga adunay likod nga bahin sa bag-ong gi-implementar nga balaod sa Land Transportation Office (LTO) nga di na makasakay ang ubang sakop sa ilang pamilya kun adunay mga outing.
Nasayran nga ilawom sa bag-ong balaod, hugot ng gidili ang pagsakay sa likod o gawas nga parte sa pick-up, multicab, dump truck, ug ELF truck.
Apan, sa Davao del Sur, daghan gihapon ang misupak niini hinungdan nga adunay pipila ang nahiagom sa disgrasya.
Kahibaloang namatay ang usa ka 60-anyos nga lalaki ug naangol ang tulo ka mga kaubanan niini human nga nisakay sa likod sa mini-dump truck didto sa Brgy. Managa, Bansalan, Davao del Sur.
Ang truck nahug sa sapa human nawad-an og preno samtang pakanaog sa bahadang parte sa lugar.
Luyo niini, mialma sab ang ubang nanag-iya og pick-up sanglit gamit kaayo sa ilang ubang sakop sa pamilya ang likod nga bahin sa sakyanan panahon nga adunay byahe.
Apil sa mga apektado ang mga opisyal nga sagad ginapasakay ang mga gwardya sa likod sa pick-up.
Hinuon, hingpit ng gipatuman sa LTO ang maong balaod mao nga mapugos ang mga adunay ingon niining sakyanan sa pagtuman. (Orlando B. Dinoy)