PADAYON pang gitugkad sa kapulisan ang motibong nagluyo sa kamatayon sa mag-uuma nga gipusil samtang natulog sa likod sa ilang balay sa Purok 2, Sitio Bacno, Barangay Camantangan sa Montevista, Compostela Valley alas 2:00 sa hapon, Biyernes, Oktubre 11, 2019.
Ang biktima giila nga si Loreto Egna Tiong, 41-anyos, minyo, mag-uuma ug molupyo sa nahisgutang dapit.
Sa report nga nakuha gikan sa Compostela Valley Provincial Police Office nasayran nga usa ka tawag sa selpon gikan kang Roberto Garcia ang nadawat sa Montevista MPS nga nagpahibalo kabahin sa maong insidente sa nahisgutang dapit.
Dayong miresponde sa dapit ang mga personahe sa Montevista MPS aron sa pagsusi sa hitabo apan pag-abot sa dapit ang biktima gidala na sa iyang mga kabanay sa Comval Provincial Hospital alang sa hinanaling medikasyon apan gideklarang dead on arrival sa doktor nga mihiling.
Base sa inisyal nga imbestigasyon, ang biktima natulog sa duyan sa likod sa ilang balay dihang miabot ang wala mailhing tawo nga nangita sa biktima ug nangutana kung aduna ba’y yuta nga ibaligya.
Ang asawa sa biktima nga si Lenny Capangpangan Tiong, 39, giubanan ang suspek sa likod sa ilang balay apan sa pagkakita sa suspek sa biktima mihulbot sa wala matinong kalibre ug gipusil ang biktima sa makadaghang higayon tumong sa nagkadaiyang parte sa lawas.
Human sa gihimong krimen ang suspek mikagiw palayo paingon sa direksyon sa Barangay Poblacion sakay sa wala matinong motorsiklo nga gimaneho sa wala mailhing drayber.
Narekober gikan sa crime scene ang lima ka basiyo sa caliber 45 nga pistola.
Patay’ng lawas sa biktima gipahiluna sa Lord Anthony Funeral Parlor sa Brgy. Poblacion, sa maong lungsod. (Dexter T. Visitacion)