KAGUOL ang gibati sa mga kabanay sa babaye nga nagpakamatay pinaagi sa pag-inom og insecticide sa Purok 2, Tagbaros, sa Maco, Compostela Valley.
Ang biktima giila nga si Annaliza Hermosa Hiyan, 39-anyos, walay trabaho ug molupyo sa nahisgutang dapit.
Sa report gikan sa Compostela Valley Provincial Police Office nasayran nga ala 1 sa hapon, Sabado, Oktubre 12, 2019, ang kapuyo sa biktima nga si Rico Betonio Barillo, 40-anyos ug pag-umangkon nga si Edralyn Giyan Baguio, 30-anyos, mitaho sa Maco MPS labot sa maong insidente.
Giingon nga ang biktima nagpakamatay pinaagi sa pag-inom og insecticide nga miresulta sa hinanaling kamatayon.
Base sa saysay ni Rico mga alas 7 sa gabii nangatulog sila apan dangtan og pagka alas 10 sa gabii nakamata kini ug nakita ang biktima nga nagkurog ug nagbula-bula na ang baba.
Wa magdugay nakabsan og kinabuhi ang biktima. Dugang saysay ni Rico nga kilid sa lawas sa biktima nadeskubrehan niini ang sudlanan sa insecticide ug dunay plastik nga adunay tubig nga gisagulan sa insecticide.
Wa pa sab gikabutyag sa otoridad unsay hinungdan sa pagpakamatay sa biktima. Ang patay’ng lawas sa biktima gihaya sa ilang panimalay samtang kapulisan padayong naghimo og imbestigasyon sa insidente.