GIREHISTRO sa Balamban ang ilang ikaduhang sunodsunod nga kadaugan sa basketball ug volleyball events sa nagpadayon nga Cong. PJ Cup nga gipahigayon niadtong Sagbado sa lungsod sa Aloguinsan.
Sa basketball, ang Balamban nakaipsot sa mga kamot sa Barili, 91-86, samtang sa volleyball event, gipatapsingan usab sa Balamban ang Barili, 2-1.
Sa laing duwa, human sa ilang kulbahinam nga kapildihan sa opening day sa host Pinamungajan, 69-66, ang Asturias mibangon ug ning higayona ilang gidominar ang Aloguinsan, 10-91.
Hinuon, nasugamak sa laing kapildihan ang ilang volleyball team human kini miyukbo sa Aloguinsan, 0-2.
Ang Balamban mao karon ang naghupot sa liderato sa basketball nga may 2-0 nga barahan, samtang gikasawo usab nila ang Aloguinsan sa unang puwesto sa volleyball, 2-0.
Ang mga duwa mitapon kagahapon sa lungsod sa Asturias diin ang Tuburan nakigparang sa Aloguinsan samtang ang Asturias nakigbatok sa Barili sa volleyball.
Ang duha ka mga lungsod mao usab ang magsangka sa basketball event. Hangtod ning pagsuwat padayon pa ang kombati. (JBM)