SAKTONG dominasyon maoy gipakita sa Admin Team sa dihang ilang gikuso-kuso ang Warehouse squad, 82-55, aron langkaton ang unang luna sa championship round sa 1st Tubu Master Construction and Services basketball tournament nga gipahigayon sa Barangay Basdiot gym, lungsod sa Moalboal.
Naghugpong sila si Rodolfo Borja ug Paul Campana og 44 puntos sa maong kadaugan nga naghatag usab kanila og twice-to-beat advantage sa finals.
Si Borja mipuga og 24 puntos, samtang si Campana midugang og 20 nga igo na kaayo nilang nakapahimong co-best players awardees.
Samtang sa losers bracket, gilubong usab sa Garden Village ang Beyond Island, 87-73, aron pagpabuhi sa ilang paglaom nga makakuha og puwesto sa finals.
Sa makausa pa, wa kapugngi si Raymond Daniega sa opensa sa Garden Village og mipakatap kini og 30 puntos aron angkunon usab ang best player of the game.
Niini, ang Garden Village ug ang Warehouse maoy magsangka sa knockout semifinal game diin ang modaog maoy moparang sa Admin alang sa championship round.
Ang torneyo gipahaom alang sa mga empleyado sa Tubu Master Construction and Services ug nagsilbing kabahin sa ilang sportsfest.
Sinalmutan sa lima ka teams, ang tournament nga giayudahan nila ni kanhi PBA player Renato Alforque ug Rey Canoy, gisugdan niadtong Oktubre 6. Ganting salapi og tropeyo ang nakahan-ay alang sa mga mananaog. (JBM)