GIUSBAN pagmakmak sa Brooklyn Nets ang Los Angeles Lakers, 91-77, kagahapon sa pagtiklop sa ilang pre-season China tour sa National Basketball Association (NBA) sa Shanghai, China.
Dobleng blackeye ang nasinati sa Lakers ning maong kombati gumikan kay gawas sa kapildihan, naangol sab ang tuo nga kumagko sa kamot sa usa sa ilang labing mga sinaligan nga si Anthony Davis.
Si Davis ipaubos sa medical test aron pagdeterminar kon unsa ka grabe ang iyang pagkaangol, nga sa inisyal nga pagsusi sa Lakers usa lang ka pi-ang.
Gipangulohan ni Caris LeVert ang Nets pinaagi sa iyang 22 punros sa 8-of-11 shooting, nidugang og 14 puntos si Taurean Prince samtang niamot og 11 puntos si DeAndre Jordan.
Ang Lakers gipangulohan ni Avery Bradley pinaagi sa iyang 14 puntos samtang nihatag og 11 puntos si Kentavious Caldwell-Pope.
Gikan sa iyang pagkaangol, si Davis miduwa pa og pipila ka mga minutos.
Miduwa si Davis sa tibuok 1st quarter una kini migawas ug wala na mibalik.
Si Davis hasta ang sama niyang All-Star nga si LeBron James ningmugna og unom ka mga puntos matag usa.
Ang Nets ningkombati nga wala ang ilang sinaligang pointguard nga si Kyrie Irving, kinsa naangol sa miagi nilang duwa.
Mao kini ang ikatulong duwa sa matag team sa pre-season diin pareho silang migamit og lainlaing starting line-up sa matag duwa.
Samtang, ningsubang ang Phoenix Suns ug ilang gipangpukan ang Portland TrailBlazers, 134-118.
Gipangulohan ni Kelly Oubre Jr. pinaagi sa iyang 19 puntos, nidugang og 18 puntos matag usa sila si first-round pick Cameron Johnson ug Tyler Johnson samtang nihatag og 16 puntos si Frank Kaminsky.
Ningkombatiha, ang Suns nakapauwan og 24 ka three-point shots sulod sa 45 ka mga pagsuway. (AP, ESL)