MIKULIT og kasaysayan alang sa Pilipinas ang gymnast nga si Carlos “Caloy” Yulo dihang nakalangkat kini og gold medal sa floor exercise sa 41st FIG Artistic Gymnastics World Championships sa Stuttgart, Germany niadtong Sabado, Oktubre 12.
Mao kini ang labing unang gold medal sa Pilipinas nga gikan sa Gymnastics World Championships.
Si Yulo, 19, maoy labing batan-on ug labing gamay nga partisipante sa prestihiyusong kompetisyon.
Sulod na sab sa ubay-ubay nga katuigan nga nagbansaybansay si Yulo sa Tokyo, Japan ubos sa paggiya ni Japanese coach Munehiro Kugimiya.
Nagpasalamat si Yulo kang Gymnastics Association of the Philippines president Cynthia Carrion sa pagpangita niini og paagi aron makabansaybansay siya sa Japan.
Ning maong kalampusan, naka-qualify na si Yulo alang sa 2020 Tokyo Olympics.
Gikatakdang mouli si Yulo sa nasod karong adlawa ug gihan-ay na ang iyang pag-courtesy call kang Presidente Rodrigo Duterte.
“We are thrilled with the golden performance with Yulo at the world champs. President Rodrigo Duterte is happy,” pamahayag ni Philippine Sports Commission (PSC) chairman William Ramirez.
“The Office of the President and the PSC family congratulates Caloy on this achievement. Mabuhay ang atletang Pilipino!”
Lakip sa mga ningpahalipay ni Yulo mao sila si Philippine Olympic Committee (POC) president Abraham “Bambol” Tolentino.
“His hard work and dedication paid off,” batbat ni Tolentino
“His accomplishment should inspire our other athletes to do well in the 30th Southeast Asian Games in December.”
Gipatigbabawan ni Yulo ang walo ka finalists pinaagi sa impresibo niyang performance nga naghatag kaniya og makapakurat nga 15.300 puntos.
Ang silver medalist nga si Artem Dolgopyat sa Israel sikit nga nagsunod kang Yulo nga adunay 15,200 nga puntos. (ESL)