NIPAGAWAS na sa iyang habig si University of Southern Philippines Foundation (USPF) Panthers forward Steven Ursal kabahin sa iyang pagkahilambigit sa kagubot nga nahitabo sa Cebu Schools Athletic Foundation Inc. (CESAFI) Men’s Basketball Tournament niadtong Oktubre 10, 2019 sa Cebu Coliseum.
Matod ni Ursal, human sa kagubot, miuli siya sa iyang yutang natawhan sa lungsod sa Bantayan aron magpakalma sa iyang kaugalingon human sa iyang kapungot sa tawag sa mga referee sa ilang duwa batok sa University of San Carlos (USC) Warriors.
Gipasabot ni Ursal nga wala niya tuyoa nga iyang nadapatan si USC forward Kenneth Brillo sa nahabiling 2.5 segundos sa duwa nga maoy nagdugkat sa kagubot.
“Wala gud to nako tuyoa kay na-slide man gud ko kay gi-push man ko niya then out of balance ko. Wala ko kabantay naigo siya, so, wala na ko nagdahom sa iyaha gibuhat nanukmag siya,” pasabot ni Ursal.
Gitataw ni Ursal nga wala siya nibawos dihang gisukmag siya ni Brillo sa makadaghan gumikan kay nahadlok siya nga ma-ejected.
“Unya ako wala ko nibalos kay ma-eject ko sa game unya duwa ra man gud na. It’s part of the game. Kon nisukol ko, asa nalang ang sportmanship nga word?” dugang ni Ursal.
Matod ni Ursal, nakurat siya sa desisyon sa mga referee nga pag-thrown out kaniya apan iya na lang kining gidawat.
Isip silot, si Ursal gisuspenso og usa ka duwa unya gipamulta og P5,000 ug kinahanglan kini og upat ka mga oras nga community service.
“Na-shock sad ko sa desisyon sa referee but okay ra man nako kay wala naman tay mabuhat kay naa naman na desisyon nila sa mga nahitabo nga wala sad to natuyo pero katong pagsukmag niya nako, tinuyo na gyud to kay sensitive na kaayo siya sa duwa kay wala na niya na-control iyahang emotion,” batbat ni Ursal. (JNP)