WALA pa'y usa ka bulan gikan nakagawas sa bilanggoan namaligya na pagbalik ang usa ka lalaki rason nga tiklo kini kauban ang suplayer niini niadtong Oktubre 10 mga alas 9:00 sa gabii diha sa Upper Zone 4, Bulua, Cagayan de Oro City.
Sikop sila si Manuel Dagooc y Guttirez, 37 ug residente sa Igpit, Opol, Misamis Oriental ug Jinnifer Quilab, 35, residente sa Julio Pacana St, Brgy 25, Cagayan de Oro City ug gikonsiderang High-Value Target (HVT) atol sa pagkasikop.
Atol sa press conference gibutyag ni PLtCol Mardy Hortillosa, tigpamaba sa Cagayan de Oro Police Office (Cocpo) nga nagpahigayon ang tinugyanan sa Police Station 7 (PS7) sa Bulua og operasiyon kauban ang Regional Drug Enforcement Unit (RDEU-10) hinungdan sa pagkasikop sa mga suspetsado.
Giingong si Dagooc wala pay bulan nakagawas ug nagbaligya na pagbalik.
"September 23 2019 after ana pagkagawas niya nag deal dayon siya sa iyang mga contact ug naatol iyang gi contact informant nato, kani si Jinnefer Quilab mao ni ang ga supply sa iya og shabu pag drug buy bust nakuhaan siya og isa ka pakete nga shabu nga more or less 3 grams upon arrest nakuha na dayon ang 50 grams kang Jinnifer, " matud ni Hortillosa.
Samtang gipanghimakak sa mga suspetsado nga gapamaligya og shabu ug igo lamang gagamit ug pangkunsumo kay lage giingong dili na mapugngan ang pagka-adik sa ilegal nga druga.
"Igo raman to gihatag,gibilin ba mga tawo ra pud nga kuan sauna, wala ako lang man tong gikunsumo,5 ka gramo raman tingale to," matud ni Quilab.
Gidugang pa nga aminado kining dili mapugngan ang paggamit sa ilegal nga druga apan naningkamot nga mapugngan ang adiksyon sa ilegal nga druga.
"Addiction man gud disease man gyud ng addiction so pero naningkamot gihapon ko nga malikayan gyud," dugang pa.
Nasayran nga nagkaila ang duha sa Lumbia City Jail human nabilanggo sa tulo ka tuig.
Gipanghimakak usab ni Dagooc nga gapamaligya og ilegal nga druga ug gihimakak usab nga iyang suplayer si Quilab. Gani giingong gibutangan lang sa maong ilegal nga druga.
"Wala ,gihulog rako sa asset ,gitudlo,di man to akoa,ma ingon ana gyud gagamit ko," matud pa.
Ang mga suspetsado nagtingkagol na pagbalik sa bilanggoan.