DILI lamang ang mga iresponsableng mga residente sa Barangay Bonbon ang mabasol sa pagsaka sa coliform level sa Macajalar bay apan giingong lakip na usab ang mga nanimuyo sa bukirang bahin diin ang tubig sa suba makapaingon man sa maong dapit.
Gibutyah sa tsirman sa Barangay Bonbon nga si Allan Mabalacad nga dili lang ang mga nanimuyo sa maong dapit ang mabasol.
"Naa gyud high level of coliform in our seashore. But dili ang taga Bonbon naka-cause ana. Hugaw gikan sa upstream paingon sa ubos nga mga hugaw ga padulong sa atong dagat. Naka-contribute man gani ang Bonbon portion lang specially sa Zone 9 ug sa Zone 1," matud niini sa Sun.Star Cagayan de Oro.
Gitumbok niini ang mga dapit sama sa "Punta" ug "Puntabon" nga duol sa baba sa suba nga mag-atubang sa Barangay Macabalan diin ubay-ubay ka mga pamilya ang nanimuyo palibot sa seawall ug gihimong pansayan ang dagat.
"Kana nga issue gi raise ko na during my first term after sa study by the Xavier University nga ilang na found out nga taas ang coliform content sa atong dagat," dugang pa.
Nasayran nga nagpahimangno ang lokal nga kagamhanan sa siyudad sa dili pagkumpiyansa sa pagpangaligo sa Bonbon tungod sa nakitang taas nga coliform level atol sa second quarter ning tuig tungod kay dili kini luwas ilabi na kung makainom og tubig nga dunay bakterya.
Nasayran usab nga ang coliform bacteria usa ka organismo nga anaa makita sa palibot ug nagagikan sa hugaw sa tawo o mananap.
Tungod niini nanawagan si Mabalacad sa dili pagpagawas sa hugaw ilabi na sa Zone-9 Puntabon diha sa mga river creek o sa dagat.
"Sa kadugay nga panahon pud nga mao ilang practice for sure na accumulate ang hugaw ang naka dugang pagdaghan sa maong bacteria. But nanawagan napud ko ana before sa among meeting uban sa mga Barangay nga naay mga lumolopyo nga daplin sa suba nga kung mahimo dili na mangalibang diretso sa suba. I need to reiterate again apil pud ang mga establishment nga directly nag connect sa ilang mga hinugasan sa suba. Certainly, paingon gyud na sa Bonbon specially kung magtaub (high tide) na," dugang pa.
Samtang nanawagan usab si Kagawad Jerome Sambaan nga dili ideklarang tanang dagat sa Bonbon ang dili luwas nga kaligoan.
"Naay time nga nag clean-up drive dire sa Bonbon kadtung mga national government people nagkuha silag sample sa stagnant water dapit sa Zone 1. Kabalo kita mao jud na ang tugpahanan sa tanang basura from Cagayan river and then daghan baboy dadto nga area. Na-generalize na hinoon ang tibook Bonbon," matud niini.
Nasayran nga ang Barangay Bonbon ilado sa Tamban-Nipa nga produkto ug mga resorts sama sa Raagas beach, Maandig beach, Villagracia, El Dorado ug Jesper Beach.
Samtang pipila usab sa mga residente ang nasuko human nakadungog sa balita nga hugaw ang maong dapit diin daghan usab ang niuyon niini.
Pipila usab ang nisugyot nga angayang nagmugna og ordinansa ang barangay nga mamahimong malimpyo ang kadagatan ug mga baybayon.
Samtang ang caretaker sa sa El Dorado nga si Hector "Bobong" Baal nibutyag nga bisan pa man sa maong balita wala naapektohan ang negosyo.
"Wala may na change daghan gihapon ga-anhi sa amo. Kabalo man ang mga tao na malubog gyod ang dagat ilabi na kon kusog ang ulan. Ang mga water lily dili man na sa Bonbon gibanlas lang gikan sa suba. As far as El Dorado is concerned, it's business as usual," matud ni Baal.
Sa pagsulat niini nga balita walay natala usab nga mga kaso nga nadala sa ospital human naligo sa Bonbon beach base na usab sa City Health Office (CHO). (Gi-translate ni Kris C. Sialana)