UGDAW ang 28 ka mga balay human gilamoy sa kalayo niadtong Oktubre 11 mga alas 7:46 sa gabii sa Burgos-Del Pilar, Barangay 17 ning siyudad sa Cagayan de Oro.
Anaa sa P1.2 milyones ang natalang damyos sa sunog nga nagsumikad sa panimalay nila ni Raymon Rotoras.
Sa pakighinabi kang Fire Inspector Sam Lawrence Velarde, sa Bureau of Fire Protection (BFP) giingong gitutokan ang anggulo sa giingong nabiyaang gilung-ag ug gidulaan sa nahabiling bata ang kalayo.
"Ang initial nga giingon sa silingan kay sila raman pud nahabilin kung asa nahitabo ang sunog ang bata nagdula daw siya og haling nga gilung-ag sa iyang ginikanan," matud nine Velarde.
Samtang gibutyag usab ni Kagawad Gloria Baldon, kinsa lakip usab sa nasunogan nga nakita niini ang dakong kalayo gani gisulayan pa sa pagsabyag og tubig apan dili kaayo maabot tungod kay anaa kini sa ikatulong andana.
"Nakita gyud namo nagdagan dagan ko sa banyo kay kusog naman kalayo sa taas, akong nahibaw-an naglung ag daw sila unya basin nahubas na nangaligo sila didto sa balay sa iyang mama," matud ni Baldon.
Nasayran nga anaa sa mga kapin 30 ka pamilya ang nawad-an sa panimalay.
Gideklarang fire out mga alas 9:13 sa gabii diin niabot kini sa ikaupat nga alarma.
Padayon nga nagpahimangno ang tinugyanan sa BFP nga dili pasagdan ang mga bata nga magdula og mga tinubdan sa kalayo sama sa lighter, posporo, baga ug uban pa.