USA ka dinalian nga lakaw nakaaghat nako pagsakay og taxi. Sama sa naandan, ang diha sa akong hunahuna nga manglaktod aron daling moabot sa akong tuyo. Human nako sultii ang driver sa akong distinasyon ako siyang hidaygan kong mahimo manglaktod mi aron maabtan pa nako ang akong tuyo. Ang sulti sa driver, “di ko pasalig bay kay basin mosum-ok ta sa laktoranan, masugamak unya hinuon ta sa problema sa trapik.”
Nasabtan nako ang iyang pagpasabot tungod kay ang among destinasyon sa Basak, Mandaue City. Di layo sa simbahan sa Birhen sa Fatima. Gikan ko nga nisakay sa Panagdait habig sa dakbayan sa Sugbo. “Pero kong imong gusto nga molusot ta agi sa Kalderohan, atong sulayan," pulong sa driver. Sa akong hunahuna pastilan og mataymingan nga moarangkada ang mga dagkong trak didtong dapita basin masiyakoy among biyahe. Kana man gung kalderohan naandan na namong agian sa akong news team kaniadto inay nga sa highway mi moagi. Tinuod gihulagway nang dapita nga agianan sa dagkong trak tungod sa mga pabrika, bodega og ubang mga patigayon nga nag gamit og mga trak paghakot sa ilang mga produkto.
Pun-an sa kaapiki sa karsada, di kalikayan nga mokalit lang og kahuot ang dagan sa trapiko. Wa na lang ko mamugos. Resulta pwerteng dugaya nakong naabot sa akong tuyo. Pipila ka tuig ang nakalabay kauban sa aking news team, naagian namo ang grupo sa mga lalake nga namara og mga sakyanan sa may Tuyan, Naga City. Ang ilang gipara ang gikan sa South. Abi ko og mga tinugyanan sa trapiko nga nagpahigayon og operation. Among gihunongan pagsusi kon unsa nga matang sa operation. Akong nasayran nga sakop sila sa usa ka pribadong opisina nga nagpahigayon og feasibility study alang sa usa ka proyekto.
Ang ilang tuyo mao ang pagkuha og data pila ka sakyanan ang moagi didto nga para Mandaue City, Lapu-Lapu City ug ubang bahin sa norte. Basi sa ilang listahan daghan tinuod nga mga motorista ang padung sa norte. Ang uban manarbaho sa Mandaue. Ang uban moadto sa airport. Dunay mobiyahe padung sa Danao, Bogo ug Bantayan Island. Wa man tuod sila magpa-interview pero ilang gisultian nga ang data nga ilang matigom apil sa feasibility study alang sa katukoran sa usa ka mega highway nga motadlas sa kabukiran sa Naga City, Minglanilla, Talisay City, Cebu City ug Mandaue City. Paglabay sa laing duha ka tuig, akong nasayran nga gisugdan na pagtrabaho ang maong proyekto.
Sa pagka tinuod, nganong moagi pa man og urban center kon ang imong tuyo para airport. Diha sa Cebu South Coastal Road (CSCR) ug South Road Properties (SRP) daw manglupad ang ubang sakyanan didto kay nagdali basin mabiyaan sa ilang flight. Ang uban padung pa sa norte. Kon duna pay kalakturan, di na kinahanglan mosum-ok sa nagdagtum nga aso nga gibugwak sa mga nabara nga sakyanan tungod sa grabing trapik. Sa mga lungsod unta sugdan na og plano asang dapita mahimong kaagian nga di na kinahanglan moagi pa sa tungod sa munisipyo o simbahan apil na ang public market. Di ba mao man ni ang kasagaran nga agianan diha sa kalungsoran. Usa ka desinyo niadtong panahon nga maihap pa lang sa tudlo ang moagi nga mga sakyanan.