GIMANDUAN sa Department of Interior and Local Government (DILG) niadtong Hulyo 29 ning tuiga ang local government units (LGUs) sa paghawan sa tanang mga karsadang pangpubliko sa mga illegal vendors, illegal parking ug illegal structures.
Subay ni sa mando ni Presidente Rodrigo Duterte sa iyang ikaupat nga State of the Nation Address (SONA). Sanglit ang mando gikan man sa pangulo, matod sa DILG, ang mando alang sa tanang LGUs sa tibuok nasod.
Ang gigamit nga termino sa memorandum “reclaim,” ang pagbawi sa mga karsada gikan niadtong nag-ali, nagbabag niini. Ang karsada man gud alang sa mga sakyanan, samtang ang aseras alang sa mga pedestrian.
***
Niadtong Biyernes, Oktubre 11, mipagawas ang DILG sa ilang assessment, sa ilang grado sa mga LGU, sa pagtuman sa maong mando. Ang City of Naga mao ang bugtong LGU sa Metro Cebu nga nakakuha og “high compliance” rating sa score nga 91 ngadto sa 100 porsyento.
Ang Cebu City, Mandaue City, Talisay City ug Consolacion nakadawat sa “medium compliance” rating sa score nga 81 ngadto sa 90 porsyento. Samtang ang Lapu-Lapu City ug Minglanilla gibutang sa “low compliance” o score nga 71 ngadto sa 80 porsyento.
Hagbong ang Carcar City, Badian, Carmen, Ginatilan, Compostela, Pinamungajan ug Moalboal sa assessment sa DILG. Way gibutang nga score sa nangahagbong.
***
Apan nahibung si Cebu City Mayor Edgardo Labella sa grado nga “medium compliance” nga gihatag sa DILG sa siyudad. Giralihan na man gani siya sa mokabat sa usa ka gatos ka mga vendors nga gipapahawa gikan sa Osmeña Boulevard ug Colon Street.
Nireklamo sila nga nawad-an sila sa ilang panginabuhi kay wa silay halin sa puwesto nga ilang gibalhinan. Apan kon di sila papahawaon sa mayor, ipa-imbestigar sa DILG ang mayor sa Office of the Ombudsman.
Ang usa ka LGU adunay gahom sa pagpasira sa usa ka karsada. Basin dunay usa ka karsada sa donwtown area nga mahimong sirad-an sa gikatakdang mga oras aron didto pundukon ang mga mamaligyaay sa aseras.