DALAYGON ug angay suportahan ang pagtukod og mga publikong kolehiyo nga tunghaan sama sa pagpakatap sa tibuok nasod sa mga publikong tunghaan sa elementarya ug sekondarya (junior ug senior high schools). Dili ba daghang nabulahang mga kabus?
Napatik sa atong Batakang Balaud nga ang pagkab-ot og pormal nga edukasyon katungod sa matag lumolupyo sa nasod ug kini usa sa mga nag-unang serbisyo sa kagamhanan. Nganong sa elementarya ug sekondarya nga ang-ang sa edukasyon nato kini masinati?
Sa tersero o kolehiyo diin importante nga ang-ang sa pagpili sa karera sa kinabuhi, dili ingon kadaghan ang tunghaang publiko. Gani, ang premyado ug dekalidad nga kolehiyo ug unibersidad halos tanan gipanag-iya sa pribadong indibiduwal, institusyon o reliyusong sekta.
Ang resulta nahimong pribilihiyo sa pipila ka mga adunahan imbes katungod kini sa katawhan. Nakapakurat nga nahitabo nahimong dakong negosyo. Ang nakapaet pa kaniadto dunay dakong insentibo sa buhis ug karon dunay nagtago ubos sa foundation aron makakuha og benepisyo sa buluhisan.
Busa, ang plano ni Mayor Edgardo Labella sa pagtukod og Cebu City College (CCC) lantip nga ideya subay sa atong gisubay katarungan sa taas. Kon nahimo sa ubang dakbayan sama sa Makati, Talisay ug uban pa, nganong dili mahimong sa ikaduha nga labing dakong dakbayan sa nasod?
Pwera lang sa kasinatian sa Mandaue City Collge (MCC), apan makuhaan kini og leksiyon aron malikayan ang bulilyaso tungod sa subrang pulitika, personal nga away sa mga ambisyusong tawo sa posisyon, pagduwa sa gahom ug pangurakot sa mga ahensiya sa gobiyerno.
Tukma nga gituki ni Mayor Labella sa iyang unang termino ug matukod kini. Kon malugwayan sa dugang termino, may igong panahon siya sa paggiya sa iyang ipamugso nga kolehiyo.