ANG Cebu City Legal Office moumol og grupo sa mga abogado aron paglusad og imbestigasyon sa usa ka coffee shop nga giingong nibaligya og ilimnong makahubog ngadto sa menor de edad.
Si City Attorney Rey Gealon nagkanayon nga dili siya magduhaduha pagrekomenda ngadto ni Mayor Edgardo Labella kon mapamatud-an nga tinuod ang alegasyon sanglit usa kini sa basehan pagkansela sa ilang business permit.
“Presidential Decree 1619 prohibits the use, possession, or unauthorized sale to minors of volatile substances which induces intoxication or in any manner disturbs auditory, visual or mental processes. Selling of liquor to minors is prohibited under Sections 3 and 4,” tipik sa maong balaud.
Si Gealon nipahimangno usab ngadto sa ubang establishments nga nahimutang sa dakbayan sa dili pagbaligya og liquor ngadto sa 21 anyos paubos aron dili mameligro ang ilang negusyo.
Nasugod ang pagkabutyag sa gihimo sa usa ka coffee shop sa Aznar sa Barangay Sambag 11, dakbayan sa Sugbo, dihang nakuha kini sa usa ka video ug nag-viral sa social media ang gibuhat sa mga menor de edad sa nag-inom og bino hinungdan nga niabot sa pagtagad sa mga opisyal sa dakbayan, labi ni nga duol kini sa dako ug karaang unibersidad sa Sugbo. (PAC)