SUBSOB Na ang pagpangandam nga gibuhat karon sa probinsya sa Sugbo sa naghinangat nga pagbalik sa Suroy-Suroy sa Sugbo karong tuiga.
Gibana-bana nga di mominos 300 ka mga turista ang gilaoman nga mosalmot sa tulo ka adlaw nga pagsuroy-suroy ug pakighimamat sa 22 ka mga lungsod ug siyudad sa Sugbo nga mopasigarbo sa mga lagutmon ug uban pang angay idalit niini sa mga bisita.
Lakip sa gipangandaman karon sa Probinsya mao ang resorts ug lawak kapahulayan sa mga bisita sulod sa tulo ka adlaw ug duha ka gabii.
Mitabang usab sa pag-andam sa mga resort ang OYO Hotels & Homes nga anaa na sa 80% sa pag-upgrade sa mga room.
Gimandoan usab ni Gobernador Gwendolyn Garcia ang tanang resort owners sa pagpabilin sa standards niini nga mahimong limpyo ang tanang amenities ingon man ang pagbansaybansay sa kon unsaon pag-abi-abi ang mga bisita.
May tulo usab ka mga bus ang giandam nga makakarga og 45 ka mga tawo matag usa.
Moabot sa P16,000 ngadto sa P17,000 ang mabayran sa matag turista, lakip na niini ang bus, Suroy-Suroy Sugbo kits, katulganan ug all-you-can-eat buffet.
Human mabanhaw ang Pasigarbo sa Sugbo niadtong Agusto ning tuiga, gipahibawo ni Garcia ang pagbalik usab sa Suroy-Suroy sa Sugbo nga matod pa niya nakaagni og mas daghang turista ug mas taas nga ginansya alang sa probinsya.
Ang maong kalihukan himuon karong Nobiyembre 15, 16, ug 17, 2019.
Magsugod ang kalihukan sa lungsod sa Minglanilla ug motapos sa dakbayan sa Talisay sa katapusang adlaw.
Mga lungsod ug mga siyudad sa habagatang bahin sa lalawigan sa Sugbo ang unang suroyon. (ANV)