DILI mominos 12 ang nadakpan sa managlahi nga pagpangronda sa Drug Enforcement Unit (DEU) sa Cebu City Police Office (CCPO) ug Cebu Provincial Police Office (CPPO) niadtong Sabado, Oktubre 12, ug Dominggo, Oktubre 13.
Pasado alas 5:00 niadtong Sabado sa hapon, nadakpan si Myrtel Dapigran Alomo, 23, walay trabaho, duha ang anak ug taga dan Cabantan, Barangay Luz, siyudad sa Sugbo, ang nasakmitan og P136 mil nga shabu sa iyang posisyon.
Si Alomo gironda sa DEU sa CCPO nga gipangulohan ni PLt. Mariel Ann Piedad, hepe sa CDEU sa CCPO.
Matod ni Piedad si Alomo gi-monitor na nila sulod sa usa ka semana human usa sa nakapalit kaniya ang ilang nadakpan sa nanglabay nga adlaw sa gihimong pagpang ronda sa Barangay Luz, nga giingong nasugatan ug nakuhaan og duha ka pakete nga shabu ug niangkon nga gikan kang Alomo.
Samtang, usa ka Joseph Vinculado, 49, taga Sitio Ponce 1, Barangay Carreta ug kanhi welder, ang nakuhaan og mga napulo ka gagmay nga mga pakete sa shabu sa iyang possesion.
Si Vinculado maoy target sa pagronda sa mga operatiba sa Presinto 4 sa Mabolo Police Station.
Si Vinculado nadakpan usa ka oras ang milabay human madakpi si Alomo.
Sa laing bahin sa lahi nga operasyon nga gihimo sa mga operatiba sa Provincial Intelligence Branch (PIB) ug PDEU sa CPPO, siyam ang nadakpan pasado alas 4:00 sa Dominggo sa Barangay Linao, dakbayan sa Talisay.
Si PLtCol. Marlu Conag, pangulo sa PIB, maoy nangu sa maong operasyon nga ni resulta sa pagkasikop sa mga dinakpan.
Ang ilang target nga si Jomar Barliso, 29, nadakpan samtang ang kauban ni Barliso nga si Artele Echavez ang nakadagan sa pag-ataki na sa mga operatiba.
Sila si Barliso ug Echavez gikonsiderar nga provincial level high value target sa CPPO.
Dugang mga nadakpan mao sila si: Rolando Rocaberte, 31; Juncel Villejo, 30; Eric Vistal, 34; Jake Maneja, 27; Maclin Maneja, 44; Christian Regis, 41; Wilbert Cañedo, 32; ug nag inusarang babaye nga si Rose Marie Omagbon, 24 ,ang lakip sa nadakpan.
Sila si Omagbon, Cañedo, ug Maneja ang naabtan nga nagplastar na nga mopaingon nga mag pot session samtang ang uban nga dinakpan ang giingong nipalit og pakete sa shabu.
Sa maong pagpangronda, nasakmit ang moabot sa 20 gramos nga shabu nga mobalor og P136 mil base sa Dangeours Drugs Board (DDB) value.
Dugang ni Conag nga ilang gironda ang maong gitukod nga panimalay human sa mga reklamo sa silingan nga halos matag kaadlawon nga dunay magbisitahan nga gikahibulongan sa mga residente.
Nasayran usab ni Conag nga ang maong pundohanan ni Barliso ug Echavez mga 20 metros lang ang gilay-on sa barangay hall sa Barangay Linao, Talisay. (BBT, FMD)