NAKASAMOT sa kahinay sa dagan sa trapiko sa U.N. Avenue sa dakbayan sa Mandaue tungod sa temporaryong koral sa nagpadayong construction sa underpass sa dapit.
Gikompirmar ni Architect Florentino Nimor, head sa Traffic Enforcement Agency of Mandaue (TEAM) nga mihinay ang dagan sa trapiko tungod sa construction sa underpass .
Naapektahan sab ang traffic lights sa maong interseksiyon tungod maigo kini sa nagpadayong construction.
Usa sa plano sa TEAM aron makapakusog diyutay ang dagan sa trapiko mao ang pag-adjust sa traffic islands sa intersiksyon sa U.N. Avenue, sa interseksyon sa P. Burgos St. ug interseksyon duol sa Pacific Mall.
I-adjust ang maong traffic island aron dili maapikihan ang mga motorista sa pagliko sa maong interseksiyon ug adunay igong lugar nga makaliko kini, sigon ni Nimor.
Sa pagkakaron, gi-finalize pa sa Traffic Planning team ang maong plano ug isumitir kini ngadto sa Depratment of Public Works and Highways (DPWH) sa paningkamot nga dunay alibyo sa trapiko sa maong dapit.
Nagplano sab sila sa pagtaod og signal light sa P. Burgos St. intersection sa dapit.
Nasayran nga usa sa nakapalangay sa pagtukod sa underpass sa dapit mao ang pagkuha og road right of way alang sa pagsugod sa underpass project.
Gilauman ang underpass mohatag og kasulbaran unya sa dugay nang problema sa trapiko padulong sa Mactan airport agi sag Marcelo Fernan Bridge gikan dapit sa highway sa Pacific Mall. (KFD)