GISUSI karon sa kapulisan kon aduna bay foul play sa kamatayon sa usa ka lalake nga napalgan na lang nga patay sa daplin sa dan, sa sitio Sangi, Barangay Tabunok sa dakbayan sa Talisay niadtong Sabado sa alas 9:00 sa buntag, Oktubre 12.
Ang lalake ang naila lang sa pangalan nga 'Frankie,' ang nakit-an na lang sa mamaligyaay sa usa sa mga stall sa Complex sa Tabunok, nga naghigda sa daplin ug nanggahi na.
Si Joselito Caballero kinsa usa sa mga nakabantay, ang dali nitawag sa Talisay Rescue Emerhency Assistance Team (Treat) ug sa mga pulis.
Apan pag-abot sa mga sakop sa Treat, gideklarar nga pipila na ka oras nga patay ang lalake.
Gituohan nga natural nga kamatayon lang ang naangkon sa lalakeng nailhan lang nga Frankie.
Matod ni Police Major Orlando Carag, hepe sa kapulisan sa siyudad sa Talisay, nga gitug-an sa mga saksi, nga nakit-an pa kini Biyernes sa gabii, Oktubre 11, nga hubog kaayo ug susama nagping-ot sa kasakit sa iyang tiyan ug naglisud sa pagginhawa sa maong dapit.
Wala ra usab gipanumbaling sa mga nakasaksi, sa pagtuo nga tungod lang sa iyang kahubog.
Nanawagan karon ang kapulisan kon si kinsa ang pamilya sa maong lalake, kon buot ba niini nga mapaubos sa autopsy ang patay nga lawas.
Ang kapulisan ang mohimo gihapon sa pagsusi kon aduna bay foul play ang kamatayon niini, bisan kon giingon sa mga saksi nga natural death lang ang naangkon sa usa ka ginganlan og 'Frankie.'
Sa laing bahin, malampuson ang pagpahigayon sa Inasal Festival sa Barangay Poblacion, Talisay, kagahapon, Dominggo, Oktubre 13.
Nagkalainlaing contingents ang nagpasigarbo sa ilang mabulukong costumes ug pagparada sa lamiang inasal sa Talisay.
Una nang gipamahayag sa batan-ong si Mayor Samsam Gullas sa iyang pakigpulong atol sa iyang unang 100 ka mga adlaw isip mayor mao ang pagpalambo sa turismo sa Talisay.
Ang Inasal Festival usa sa iyang giplanohan nga mas palambuon pa uban sa pag-ugmad sa unang proyekto sa dakbayan nga nagsentro sa turismo.
Usa sa naila ang dakbayan mao ang Talisay Landing sa Ikaduhang Gubat sa Kalibotan. (FMD, BBT)