NGANONG angayan nga matukod ang Cebu City College (CCC)?
Si Mayor Edgardo Labella nagkanayon nga karon na ang hustong panahon para makabaton og kaugalingon nga kolehiyo ang siyudad kansang mga kurso haom sa panginahanglan.
Ang mayor niingon nga ang katukoran sa CCC kansang ordinansa pending pa sa City Council, iyang gihulagway nga gibabagan ni Konsehal Joy Young, sanglit gusto niya nga ang City Ordinance 2320 nga giaprobahan niadtong 2012 maoy masunod.
Apan si Labella niingon nga mismo ang Commission on Higher Education (Ched) ang nibutyag dili na haom ang maong ordinansa alang sa CCC subay sa mga pagtuki sa konseho alang sa proposed ordinance ni Konsehal Raymond Garcia.
Iyang gihulagway nga dili kini mokompetensiya sa mga kurso nga gitanyag na sa private ug public colleges ug universities.
Lakip sa mga four year course nga gitanyag mao ang Solid Waste Management, Flood Control, Traffic System, Environmental Management, Water Systems, Nutrition Science, Hospital Administration ug Nursing diin ang gobyerno mao ang magbayad sa tuition sa mga mamahimong estudyante.
Ang mga two-year course mao ang Caregiving, Welding, Hotel and Service Industry, Sustainable Farming ug Robotics.
“What my administration proposes is a public institution that offers courses tailored to the aims of our City’s capacity to receive economic inputs,” padayag ni Labella.
“Our City must train local technocrats to work on issues plaguing us for close to three decades now like garbage, flooding, and dysfunctional water system,” dugang sa mayor kinsa niingon nga apil na ang problema sa siyudad ug uban pa.
Kini maoy bug-at nga rason ni Labella nganong siya nangusog nga matukod ang CCC ug iyang giawhag ang mga gustong mobabag sa maong katuyoan paglili sa maong panginahanglan.
Sa miaging public hearing sa konseho sa ordinansahon ni Garcia para maoy basehan sa CCC, girekomenda sa Ched ug City Legal Office pinangulohan ni Atty. Rey Gealon, pagbawi sa CO 2320 sanglit wala kini makasunod sa lagda sa memorandum circular sa Ched.
Si Garcia nagkanayon nga ang usa sa katuyoan sa maong ordinansa mao ang pag-adopt sa Cebu City Medical Center College of Nursing nga dili mahimo ubos sa lagda sa Ched.
Ang anak ni kanhi Mayor Alvin Garcia nagkanayon nga sa iyang bag-ong ordinansa, nakalatid na niini ang tanang rekisito nga gipangayo sa Ched aron maka-operate og Local College ang Cebu City.
Sa pagkakaron, padayon pang nangita og yuta ang City Government aron tukoran sa edipisyo kansang pundo adunay gikan sa national government ug abagan sa local funds.
Ang mayor nagkanayon nga kon makumpleto na ang tanang gikinahanglan diin ang ordinansa maoy numero uno posible nga matukod na kini sunod tuig sanglit usa kini sa iyang campaign promise dihang siya nagpapili pa.
Ang pagtukod ni Labella sa CCC aduna nay pagtugot gikan sa Ched ug nakigtambayayong na usab ang mayor sa mga eksperto alang sa mga kurso aron ang mga underprivilege mahatagan og kahigayonan nga makatungha.