SUPERBALITA CEBU

Basurero naligsan sa garbage truck, patay

USA ka basurero sa barangay ang patay human naunay nga naligsan sa garbage truck sa Barangay Lagtang, dakbayan sa Talisay niadtong Sabado sa buntag, Oktubre 12.

Giila ang biktima nga si Victor Baranggan, 47, taga Sitio Sambagan, Lagtang, Talisay.

Patay dihadiha si Baranggan human nalatayan ang ulo niini sa garbage truck.

Nahitabo kini sa Kishanta Village, Lagtang, alas 8:10 sa buntag sa naasoy nga adlaw.

Matod ni Police Major Orlando Carag, hepe sa Talisay City Police Station, nga padung mangolekta og basura sa maong lugar ang grupo nila ni Baranggan.

Apan samtang nag-atras ang sakyanan sa dulhugon nga dapit aron unta sa pag-park, giingong kalit nga niambak gikan sa truck sa kilid nga bahin biktima.

Ang garbage truck gimaneho sa kauban niini nga si Ulysses Cabuenas, 63.

Giingon nga na-out balance si Baranggan hinungdan nga natumba kini paubo.

Wala nabantayi ni Cabuenas ang pag-ambak sa biktima, natingala nalang siya nga niuntol ang likud nga bahin nga ligid sa sakyanan.

Sa pagsusi ni Cabuenas, nalatayan na sa tuong likud nga bahin sa ligid ang ulo sa biktima.

Daling nitawag og pakitabang si Cabuenas, apan sa pag-abot sa Talisay Rescue and Emergency Assistance Team (Treat), gideklarar na kini nga patay na.

Tambag ni Carag sa kang bisan kinsa, nga samtang nagdagan pa ang sakyanan nga giluwanan, dili dayon moambak aron kalikayan ang susama nga disgrasya.

Si Cabuenas kasamtangan karon nga gitanggong sa selda sa Talisay City Police Station ug gipaabot ang tukmang kaso nga ipasaka batok kaniya o sa posibilidad nga makig-areglo sa pamilya sa biktima.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph