WAY klase karon, Martes, Oktubre 15, alang sa mga pampubliko nga tunghaan sa dakbayan sa Talisay.
Nipagawas og kamanduan si Talisay City Mayor Gerald Anthony Gullas, subay na sa kapistahan.
Nipagawas og kamanduan gahapon, Lunes, Oktubre 14, pagkanselar sa klase gikan sa daycare, elementarya, sekondarya hangtud na sa kolehiyo sa pampubliko nga tunghaan sa Talisay aron paghatag kahigayunan sa mga tinun-an ug ubang Talisaynon nga makasalmot sa bisan unsa nga mga kalihukan may labot ang kapistahan.
Matud sa mayor nga giuyunan na usab kini sa Department of Education (DepEd)Talisay City division.
Apan gihatag na sa mayor ang discretion alang sa mga pribado nga tunghaan kon mokanselar ba usab sila sa klase.
“Please take this opportunity participate in our fiesta activities. I suggest take this time to visit church to pray to God and thank St. Theresa for all the blessings you have received this year,” pahinumdom sa mayor.
Usa ka Pontifical Mass nga panguluhan ni Cebu Archbishop Jose Palma ang himuon alas 9:30 sa buntag diha sa simbahan sa Sta. Teresa de Avila.
Sa gabii, usa sa highlight ang daku nga fiesta nga mao ang konsyerto sa usa ka national nga banda, ‘Parokya ni Edgar’ alas 9 sa gabii. Libre kini, hinungdan nga ‘first come, first serve basis’.
Himuon kini sa dakung hawanan sa Talisay City Central School, diin gilantawan nga maka-accommodate og 10 mil ka mga tawo.
Hinungdan nga tambag ni Mikki Aznar ang officer-in-charge sa Tourism department, nga mas maayo mosayo, kay kon makita na sa kapulisan nga napuno na ang venue, dili na gyud kini pasudlan pa.
Pahibalo sa kagamhanan nga dili tugutan nga mosaksi ang mga mabdos, mga nagpangidaron og 70 anyos pataas, ug mga masuso.
Gibawal usab nga makasud sa concert area ang mga bisan unsa nga bag, payong, kalo, bladed weapon, ilimnong makahubog, lighter, sigarilyo, labawng gidili ang mga armas ug illegal nga drugas.
Ang kapulisan sa alerto ug higpit sa segurida.