NIDESISYON si PNP Chief Gen. Oscar Albayalde nga moluwat na lang sa iyang posisyon ug mag “non-duty status” siya samtang niinit pagsamot ang imbestigasyon ngadto sa giingong iyang pagdupa sa 13 ka mga ninja cops.
Ang 13 nalambigit sa usa ka kasong pag-recycle og shabu ug sa pagpadugo lang sa druglord kaniadtong 2013 didto sa Pampanga. Ang hepe sa Pampanga niadtong tungora mao si Albayalde ug gitumbok nga siya mismo nidupa sa 13 ka pulis nga ubos sa iyang command.
Mao nga wala dayon mapakanaog ang mando niadtong tungora nga sila tangtangon sa pwesto. Gani, nakabalik pa ug nahatagan og pwesto.
Giisip na karon nga kining non-duty status ni Albayalde nga “terminal leave” kay mo-retire na man sab siya karong Nobiyembre 8, 2019.
Paeta sa kahimtang sa police chief. Nibuto ang maong isyu diha nang moretiro na unta isip hepe sa kapulisan sa nasud ug moguwa pa nga basin maapektohan ang iyang mga retirement benefits.
Apan kon lig-on ang ebidensya batok kaniya, nganong duphan man?
Mas maayo kining moluwat na siya aron makapadayon ang imbestigasyon nga walay sami ug di mabahigan ang PNP organization sa bisan unsang lama tungod sa kaso batok kang Albayalde.
Sa laing bahin, dako-ang tamparos kining maong imbestigasyon batok sa administrasyon nga nahimong sentrong kampanya mao ang war on drugs.
Kon tinuod ang mga pasangil karon batok kang Albayalde, moguwa nga ang kurapsyon tungod sa gidiling drugas niabot gyud diay sa top level sa kapulisan.
Kon tan-awn pag-ayo, nagusbat na gyud ang imahen sa maong gubat kay samtang daghan na ang nangamatay diha sa mga komunidad nga kusog ang gidiling drugas, ang mga kadagkuan sa kapulisan nalambigit diay sa giingong ninja cops.
Sa wala pa kining maong isyu, gisusi sab sa Senado ang pagbuhi sa mga druglord ug ubang mga criminal sa Bureau of Corrections. Nalambigit sa maong isyu si Nick Faeldon nga suod nga higala ni Presidente Rodrigo Duterte.
Alang kanako, nasipyat pa gyud si Sen. Bato dela Rosa dihang niangkon kini nga 120 lang ang iyang gibuhian sa panahon nga siya hepe sa Bucor.
Matod pa ni Senador Bato, usa lang ka druglord ang iyang gibuhian ug ang uban gisilotan tungod sa kasong murder ug rape.
Maayo gani kay nagpabiling popular si Presidente Duterte ug walay klarong rallying figure ang oposisyon. Tungod niini, nasiguro ko nga makalahutay kining administrasyon ngadto sa 2022.
Hinuon, di kapugngan nga dunay mga motumaw na nga posibleng modagan alang sa pagka presidente ug mokontra sa kandidato nga suportahan sa presidente. (@anol_cebu sa Twitter)