SUPERBALITA CEBU

Espinoza: Dabaweño ang acting PNP chief

Nagpakabana

GRABE. Motuo mo'g sa dili apan tuo na lang aron madali. Niadtong gabii sa Sabado duha ka oras ang among biyahe gikan sa Ayala malls padung sa among balay sa Talamban sa distansya nga wa kaabot og 10 kilometros. Nibiya mi sa Ayala 7:30 sa gabii ug miabot mi sa balay 9:30 na sa gabii.

Ang hinungdan sa grabe nga trapik, matud pa ni Col. Andres Bayarcal (ret), ang hepe sa Citom karon, mao ang tulo ka aksidente sa mga sakyanan, usa nahitabo sa dalan Gov. Cuenco ave. Gani ako pa nga naabtan ang saghiray sa duha ka sakyanan nga pribado duol sa countrymall.

Usa sa mga rason nga dugay kini mahusay tungod sa kakuwang sa traffic police investigator nga maoy moadto sa nahitaboan labina kon magdungan ang askidente.

Kaniadto, ang mobuhat sa sketch sa bangga mao ang mga traffic enforcers. Nausab ning maong sistema sa panahon ni kaniadto Cebu City Police Office (CCPO) chief Royina Garma.

Gimandoan ni Garma nga ang traffic police investigator na ang moadto sa nahitaboan ug maoy mobuhat sa sketch.

Sa wa pa giusab ni Garma ang sistema, ang mga traffic enforcer sa Citom ang moresponde sa traffic accident ug maoy mobuhat sa sketch. Medyo paspas nga moresponde ang traffic enforcer tungod kay daghan man sila samtang gamay ra ang police traffic investigator.

Kon unsay hinungdan nga giusab ni Garma ang naandan nga sistema siya ra ang nakahibawo. Sa dihang traffic enforcer pa ang moimbestigar sa bangga ug mobuhat sa sketch wala man ko kadungog nga dunay mireklamo sa mga nahingtungdan o tag-iya sa mga sakyanan.

Hinuon, duna koy nasikop nga mga storya nga ang usa sa mga rason nga gikuhaan og trabaho ang traffic enforcer sa pag-imbestigar ug buhat sa sketch tungod kay di maayo ang relasyon ni Garma ug ni kaniadto Mayor Tomas Osmeña.

•••

GAMBOA. Usa ka Dabaweño ang gitudlo nga acting chief sa Philippine National Police (PNP) sa pagbiya ni Police General Oscar Albayalde kinsa sa Novembre 8 pa unta moretiro. Si Lt. Gen. Archie Gamboa, nga nagtubo sa Davao city, ang natudlo nga kasamtangan nga hepe. Si Gamboa ikaduha o maoy nagsunod ni Albayalde nga pinakataas nga opisyal sa PNP.

Sa press conference, nga gipahigayon kagahapon sa Camp Crame, maayo kaayo nga gitubag ni General Gamboa ang mga pangutana sa mga sakop sa media. Gipahigayon ang press conference human nga mitahan si Albayalde sa iyang resignasyon ngan nga PNP chief ngadto ni Interior Sec. Eduardo Año.

Nagkaila mi Lt. General Gamboa tungod sa Rotary Club niadtong Tuig 2017 kay ang iyang hamili nga kapikas, Twinkle Gamboa, presidente kaniadto sa Rotary Club Downtown Davao city samtang presidente sad ko kaniadto sa Rotary Club Cebu South.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph