HALOS 80 per cent sa mga pari nga nadestino sa Vatican mga bayot. Hinuon, dili tanan mga practising homosexual. Kini bisan pa sa kusganon nga pagsupak sa Simbahang Romano Katoliko sa gay advocacy.
Ang bayot nga mga pari nagsagop sa “unspoken code” diin buot ipasabot nga ang usa ka kardinal o bishop nga nagkondenar sa homosexuality, bayot usab diay, matod pa sa libro nga sinuwat ni French journalist Frederick Martel nga nag-uluhan og “In the closet of the Vatican”.
Napatik sa maong libro nga si Colombian Cardinal Alfonso Lopez Trujillo mi-depensa sa posisyon sa simbahan kabahin sa homosexuality, matod pa sa pamantalaang The Guardian. Ang author sa maong libro nagkanayon nga mihimo siya og 1,500 interviews sa 41 ka mga Kardinal, 52 ka mga Bishops ug mga monsignors ingon man 45 ka mga Papal ambassadors o diplomatic officials, 11 ka mga Swiss guards ug mga 200 ka mga kaparian ug mga seminarians. Ang libro ni Martel nagbutyag sa “clerical culture of secrecy” ug “double lives” o kinabuhi sa mga kaparian.
Well, dili na man bag-o kanato kining maong matang sa taho. Gani daghan man ang nahitabo dinhi sa ato nga mga salawayong binuhatan sa atong mga kaparian. Usa ka gani ka iladong Monsignor nga taga Sugbo nag-atubang man og child abuse didto sa Estados Unidos pipila na ka tuig ang nakalabay. Dinhi sa ato, daghan usab nga mga reklamo nga nadawat ang mga kadagkuan sa Simbahang Katoliko kabahin niini.
Pero ang uban gipasagdan lang. Ang simbahan nagtudlo og moralidad. Taas kaayo ang standard sa simbahan kon moralidad na ang hisgutan. Inay sila ang motudlo kabahin niini apan ang uban naman hinuon kanila ang nagpabadlong. Aw, hinuon dili man nato kini kalikayan kay naa man gyuy motulibagbag. Hinaot nga mohimo usab og “internal cleansing” ang mga kadagkuan sa simbahang sa ilang kaugalingong han-ay. Kini aron magpabilin ang pagsalig sa mga sumosunod sa alagad sa simbahan. (bobbygnalzaro@gmail.com)