NAKAPASAR ang dakbayan sa Sugbo sa validation sa Department of Interior and Local Government (DILG) kalabot sa pagpatuman sa paglimpiyo sa mga sidewalks ug mga nag-unang kalsada sa maong dakbayan.
Si DILG undersecretary Epimaco Densing III kinsa nangulo sa pag-inspeksiyon sa mga nahisgutang lugar mibilib ni Mayor Edgardo Labella sa pagpahiluna sa mga vendors nga dili maka-isturbo ug makabalda sa mga tawo nga moagi sa sidewalks.
Nikunhod na usab ang mga nag-illegal park sa mga daplin sa kalsada bisan tuod og dunay pipila na lang ka mga pugyot sa mga badlungon ang magpaugat gihapon.
Pero, samtang atong gihangop ang kahapsay ug kalimpiyo sa dalan diha sa kinapusorang bahin sa dakbayan, pipila usab ka mga dapit ang daw sa wa mahatagi og pagtagad kalabot niini.
Pananglitan sa south district nga habig sa Cebu City, gawas nga naobserbahan nga anaa gihapon ang mga illegal parking sa Barangay Bulacao, nagpadayon usab nga gihimong terminal ang daplin sa dalan (atubangan sa St. Paul College) nga nakabalda sa trapiko.
Mao usab kini ang atong mabantayan sa Poblacion-Pardo paingon na ngadto padulhog sa Kinasang-an matag buntag nga anaa ra haduol sa Pardo Police Station.
Ato sab gikahibulong nganong way aksiyon ang taga City Traffic Operations Management (Citom) niini nga taodtaod na man unta kining problemaha.
Unsa man say gihimo sa mga barangay officials sa maong mga dapit?
Hinaot nga mahatagan kini og aksiyon ni Labella kay mismo si Jonah Pino sa DILG kinsa maoy pangulo sa validation team sa road clearing sa Cebu City, sa iyang pamahayag sa mga media niadtong Oktubre 4, mikompirmar nga dunay mga dapit sa siyudad nga nagpadiki-diki sa pagpatuman sa mando sa presidente.