PATAY nga nabangalan ang usa ka 27-anyos nga lalake sa usa ka mananagat sa Sitio New Paradise Brgy Pajo dakbayan sa Lapu-Lapu pasado alas 6 sa Lunes sa buntag, Oktubre 14, 2019.
Nakuha sa pukot ang lalake nga giila nga si Crisenciano Comendador Jr., lumolupyo sa Sitio San Vicente Kabatuhan 3, Brgy. Maribago, Dakbayan sa Lapu-Lapu, apan lumad nga taga Lanao Del Norte. Niila kang Comendador ang iyang amahan.
Matod ni Police Chief Master Sergeant Joseph Andrin, desk officer sa Police Station 3 sa Lapu-Lapu City Police Office LCPO, nga sa pagkakaron di pa nila matumbok unsa ang hinungdan sa kamatayon ni Comendador.
Patay na kini dihang nabangalan sa usa ka mananagat kay nasangit sa pukot ang lawas.
Sa ilang inisyal nga pakisusi, wa kini lain samad sa lawas, apan nagdugo ang baba niini dihang nakit-an sa baybayon.
Base sa pamahayag sa amahan nga si Crisencio Sr., katapusan kining nakit-ang buhi niadtong Biyernes human mananghid nga molakaw.
Sunod na lang nahibaw-an sa amahan nga napalgan na kining patay nga naglutaw sa dagat.
Giingong wa magsulti si Comendador sa iyang amahan asa siya padulong hinungdan nga wa siyay ideya unsa ang posibleng gikamatyan niini.
Wa usab kini makahisgot sa iyang amahan nga aduna siyay kontra o ba kaha suliran sa kinabuhi.
Wa usab kini record sa kapulisan sumala ni Andrin.
Si Comendador kasamtangang nagtrabaho isip factory worker sa Mactan Economic Zone (MEZ).
Aron kalikayan ang pagduda, gitambagan ang amahan sa pagpaubos sa autopsy sa lawas sa iyang anak aron masuta ang hinungdan sa kamatayon niini.
“Dili pa gyud ta kaingon kon duna ba ni-foul play pero ang ilang kuan kay naa may dugo-dugo sa nawong, mao ato lang gi-advisan sa pagpa-autopsy,” matod ni Andrin. (GCM)