NIHIMO na sa ilang pakisusi ang Commission on Human Rights (CHR) 7 sa 10-anyos nga batang lalake nga napalgang patay sulod sa sakyanan sa usa ka bombero sa lungsod sa Balamban.
Gibutyag sa chief investigator sa CHR 7, Leo Villarino, nga nagpadala na sila og imbestigador nga maoy mangunay og estorya sa ginikanan sa bata.
Dugang niya nga bisan kon way plano nga mosang-at og kaso ang ginikanan sa bata, magpadayon ang ang ilang pakisusi.
Matod ni Villarino nga usa sa gihatag nila nga tahas sa ilang imbestigador kining i-kumbinser ang pamilya nga ipaubos ang lawas niini sa autopsy aron matino kon unsa ang rason sa kamatayon niini.
Gipasabot niini nga kon medico legal ang kaso susama sa nahitabo sa bata, di kini biktima sa natural death.
“Suspected medico legal case man gud ni. So the consent to have an autopsy does not actually rightfully belong to the family, it is with the prosecutor. Dapat ang prosecutor maoy mohatag og go signal or dili ba and if moingon pud ang prosecutor nga dili na necessary ang autopsy, he has to explain nganong dili man,” si Villarino nipasabot.
Usa sa tumong sa mga imbestigador mao ang maestorya usab ang kapulisan sa Balamban ug maimbitar ang bombero nga tag-iya sa sakyanan aron mahatagan og katin-awan ang kamatayon sa bata.
Ang maong bata napalgan nga patay sulod sa sakyanan ni Fire Officer 1 Orland Paul Romero niadtong Sabado, Oktubre 5 sa hapon. Gawas sa CHR 7, nihimo na usab og pakisusi ang kapulisan sa hitabo.