TRAFFIC police sa Cebu City Police Office nga gipasanginlan nga nangilkil sa usa ka trucking company ipaimbetigar ni Cebu City Police Office director Police Colonel Gemma Vinluan.
Kon masuta nga sad-an, iya kining pasakaan og kaso ug ipataktak sa serbisyo.
Nakadawat og impormasyon si Vinluan sa giingong reklamo sa mga trucking company nga gipangkilkilan sa mga sakop sa Cebu City Traffic Operation sa siyudad sa Sugbo ug personnel sa Traffic Police Branch panahon nga makagawas na sila sa gate sa pantalan.
Giingong pangitaan og sayop ang sakyanan sama sa suga sa luyo ug depektusong brake lights, lakip na ang itom nga aso nga ibuga sa tambutso ug hulgaon nga i-impound.
Apan giingong i-release ra usab kini human nga masabot ang kompaniya ug makabayad nag tag P5,000 ngadto sa P8,000.
Ang mga kompaniya nangreklamo na sa buhatan ni Mayor Edgar Labella.
Matod ni Vinluan nga iya na kining gipaimbestigar ilabi na ginganlan ang iyang sakop.
Kon masuta nga sad-an kini, pasakaan niya kinig kaso ug taktakon sa serbisyo.
Apan gikinahanglan nga moreklamo usab ang kompanya aron aduna silay basehanan sa pagpasakag kaso.
“Mag-investigate tayo tsaka mag file sila ng complaint. Hindi pwede na kwento-kwento at wala silang sinusumpaang salaysay. Although wala silang specific name, nag karoon kami ng conference. Pero accordingly may nanghihingi sa kanila,” matod ni Vinluan.
Wa maklaro kon ang nangilkil ang pulis ba o ang personnel sa CCTO nga maoy subayon kon kinsa.
Gitawgan ni Vinluan ang usa ka personnel sa traffic police, apan nanghimakak nga apil siya sa nang warta.
Giklaro ni Vinluan nga wa siyay gisugo nga pulis nga mangilkil sa mga trucking company sa siyudad sa Sugbo ug hugot niya kining gidili.
“Kasi hindi natin ito-tolerate yan kung mayrong extortion na nagaganap between Citom and traffic. Hindi natin pwedeng itolerate yan. Hindi maaring ang mali ng isang tao sisirain nya ang buong organization particularly ang Cebu City Police Office,” bahad ni Vinluan.
Sa miaging semana, mga representante sa pipila ka trucking company miadto sa buhatan ni Vinluan, uban ni Labella, aron isumbong ang gihimo sa pipila ka mga traffic enforcer ug pulis sa dakbayan.
Naghimo na usab sa ilang imbestigasyon ang Cebu City Hall labot niini. (AYB)