NAKA-hospital arrest karon ang usa ka suspek sa buy-bust sa Provincial Inteligence Branch niadtong Dominggo sa kadlawon sa Barangay Linao dakbayan sa Talisay kay nasamdan.
Si P/Lt. Col. Marlu Conag, labaw sa Provincial Intelligence Branch, niila sa suspek nga si Artele Echavez, 26, taga Barangay Linao, Dakbayan sa Talisay.
Si Echavez ikanapulo unta nga madakpan apan nakadagan.
Matod pa ni Conag nga sa operasyon, dunay nahitabo nga pinusilay nga ilang nasayran nga si Echavez ang namusil kanila.
Apan nakasibat si Echavez ug nadakpan lang human nga nagpakitabang sa iyang paryente nga anaa nagtrabaho sa Barangay Linao.
Usa sa mga trabahante sa barangay nangayo og assistance sa kapulisan sa dakbayan sa Talisay.
Dihang nasuta nga si Echavez diay ang usa sa gironda sa operatiba sa PIB, ila dayon gisuta ug nakompirmar.
Sa kasamtangan, si Echavez nakapusas sa usa sa mga tambalanan sa Dakbayan sa Talisay.
P2.3M shabu
Nasikop sa samang buy-bust operation sa PIB ug Philippine Drug Enforcement Agency 7 ang usa ka 42 anyos nga lalake ug mga kaubanan niini sa barangay Lawaan 2 alas 3 sa kaadlawon, Oktubre 14.
Ang nadakpan giila nga si Rogelio Delubio Amion, nagpuyo sa dapit, gitumbok nga high value target sa kapulisan sa Cebu Provincial Police Office.
Lakip sa nadakpan si Lyndon Lastimosa, alyas Dondon, giila nga sakop sa Franz Sabalones drug group.
Iyang giangkon nga tawo siya ni Franz apan igo ra siya nga tighugas sa sakyana.
Naapil usab sa pagkasikop silang Anthony Rijan, John Amion ug Rex Aldia.
Si Aldia naa sa tambalanan human nabalian sa tiil sa dihang miambak gikan sa atop.
Nakuha gikan sa mga dinakpan ang tulo ka dagkong bulto sa gituohang shabu nga motimbang og 360 grams nga adunay Dangerous Drugs Board (DDB) value nga P2.4 million.
Matod ni Conag nga ang illegal nga drugas nga ilang nasakmit alang sa kapistahan sa siyudad sa Talisay hinungdan nga ilang gihingusgan ang kampanya batok niini.